लक्ष्मणदत्त पन्त
महेन्द्रनगर, असार २६ गते । कञ्चनपुर उद्योग वाणिज्य संघको शनिबार सम्पन्न १७ औं कार्यकारीणी समितिको निर्वाचनबाट पिताम्बर जोशीको प्यानल बिजयी भएको छ । संघको अध्यक्षमा १ हजार २ सय ९९ मतसहित उहाँ बिजयी हुनुभयो ।
उहाँका प्रतिद्वन्द्वी गणेशदत्त जोशीले ७ सय ८३ मत प्राप्त गर्नुभयो । यस्तै वाणिज्य उपाध्यक्षमा धर्मसिंह रावल ७ सय ५८ मतका साथ बिजयी हुनूभएको छ । उहाँको प्रतिद्वन्द्वी बासुदेव जोशी (विनोद) ले ४ सय ८८ मत पाउनुभयो ।
महासचिव पदमा पिताम्बर प्यानलकै खगेश्वर बोहरा बिजयी हुनूभएको छ । उहाँले १ हजार २ सय एक मत प्राप्त गर्नुभयो । उहाँका प्रतिद्वन्द्वी निर्मला भट्ट सापकोटाले ८ सय मत प्राप्त गरेको निर्वाचन समिति सदस्य चित्राङ्ग थापाले बताउनुभयो । ३ हजार २ सय ५९ मत रहेको वाणिज्य संघमा २ हजार १ सय ८४ मत खसेको थियो ।
यसअघि अन्य पदाधिकारी र सदस्यहरु भने निर्विरोध निर्वाचित भएका थिए । निर्विरोध निर्वाचित हुनेमा बरिष्ठ उपाध्यक्षमा दिनेश मल्ल, उद्योग उपाध्यक्षमा सुरेश गुरुङ, सचिवमा राहुल भट्ट र कोषाध्यक्षमा चेतराज जोशी रहेका छन् ।
यस्तै, निर्वाचित हुने सदस्यमा बिशाल सोनार, प्रेमप्रकाश पाठक, नरेन्द्रप्रसाद जोशी, प्रदीप पाल (रदिप), भोजराज अवस्थी, मिनराज भट्ट र संस्थागत सदस्यमा रामचन्द्र बुढा रहनुभएको छ ।
