शिवकुमार रिजाल (काशी)
मनहरी (मकवानपुर), पुस १ गते । चितवन र मकवानपुरको सीमावर्ती क्षेत्रमा रहेको मकवानपुरको सुनाचुरी सामुदायिक वन उपभोक्ता समूहले आफ्ना ४५ परिवार उपभोक्ताका लागि काठबाट बनेका खाट प्रदान गरेको छ ।
मनहरी गाउँपालिका वडा नं ६ मा रहेको सुनाचुरी सामुदायिक वन उपभोक्ता समूहले विपन्न वर्गका उपभोक्ता सदस्यहरु खाटको अभावमा चिसो भुँइमा गुन्द्री ओछ्याएर सुत्न बाध्य भएकाले काठबाट बनेका बलिया खाट वितरण गरेको जनाएको छ ।
आफ्नै वन समूहबाट उत्पादित काठको उपयोग गरी निर्माण भएका चारखुट्टे खाट वितरण गरिएको समूहका सचिव रमेश कार्कीले बताउनुभयो । ४३ परिवारलाई ४५ वटा खाट वितरण गरिएको र प्रतिखाट पाँच हजार पाँच सय रुपियाँ लगानी परेको उहाँले बताउनुभयो ।
वन समूहले सञ्चालन गरेको सिलाइ कटाइ तालिममा सहभागी भएर उद्यम गर्न चाहने दुई जना महिलालाई सिलाइ–कटाइ मेसिन प्रदान गरेको छ । समूहले आफ्नो क्षेत्रमा रहेको एकमात्र माध्यमिक तहको विद्यालय राष्ट्रिय माध्यमिक विद्यालयमा स्थापित अक्षयकोषका लागि १० लाख रुपियाँ थप गरेको छ । यसअघि नै समूहले १० लाख रुपियाँ उक्त कोषमा लगानी गरिसकेको थियो ।
वन समूहले आफ्नो क्षेत्रमा रहेको पुष्पलाल आधारभूत स्वास्थ्य केन्द्रले सञ्चालन गरेको आमा समूह सञ्चालनका लागि ५० हजार, बृहद् जोगिताल खानेपानी योजनालाई दुई लाख रुपियाँ लगानी गरेको छ ।
कृषि क्षेत्रतर्फ जनजागृति दुग्ध उत्पादक संस्थामार्फत उपभोक्तालाई बाछी वितरण गर्न एक लाख रुपियाँ हस्तान्तरण गर्ने सम्झौता गरिएको वन समूहकी अध्यक्ष पार्वती मुक्तानले बताउनुभयो । एक समारोह आयोजना गरी वन समूहले डिभिजन वन कार्यालय राप्ती मनहरीका प्रमुख हेम थापाको उपस्थितिमा सहयोग हस्तान्तरण गरेको छ । कार्यक्रममा मनहरी गाउँपालिका ६ नं वडाध्यक्ष युवराज थपलिया, मनहरी सब–डिभिजन वन कार्यालयका वन अधिकृत डटेन्द्र गोले, राष्ट्रिय मावि सुनाचुरीका विद्यालय व्यवस्थापन समिति अध्यक्ष शिवलाल मुक्तान, प्रधानाध्यापक सुवास श्रेष्ठलगायत सहभागी थिए ।
