प्रेमराज सिम्खडा
कालीकोट, मङसिर १४ गते । नेकपा (एमाले) कालीकोटले सर्वसम्मत प्रतिनिधि चयन गरेको छ । मङसिर २७ गते देखि २९ गतेसम्म काठमाडौँमा हुने ११ औँ राष्ट्रिय महाधिवेशनका लागि प्रतिनिधि चयन गरिएको हो ।
कालीकोटमा चार जना खुला, दुई जना महिला, दुई जना दलित र एक जना ४० बर्ष मुनिका गरेर नौ जना प्रतिनिधि चयन भएका छन् । खुलातर्फ एमाले कालीकोटका अध्यक्ष तुलाराज मल्ल, पूर्व अध्यक्ष कुर्मराज शाही, निवर्तमान उपाध्यक्ष दयाराम सिम्खडा, प्रदेश सदस्य तपेन्द्रजंग शाही चयन भएका छन् ।
यस्तै, ४० वर्ष मुनिको युवामा टेकवहादुर वोगटी चयन हुनुभएको छ । महिलातर्फ सुभ्रदा सिंह र जलसा बुढा, दलिततर्फ पुरुषमा ब्यासी तिरुवा, महिलातर्फ शोभा नेपाली चयन हुनुभएको नेकपा (एमाले) कालीकोटले जनाएको छ ।
एमाले कर्णाली प्रदेश कमिटी सदस्य मानव बमले लामो छलफल पछि एकताको सन्देश दिने गरेर सबैलाई सर्वसम्मत चयन गरिएको बताउनुभयो । पहिलो चरणमा धेरैको दाबी रहयो, केही दिन छलफल भयो र आज अन्तमा सहमति भएर नौ जना केन्द्रीय प्रतिनिधि चयन गरिएको नेता बमले बताउनुभयो ।
सबैभन्दा धेरैको दाबी खुला कोटामा थियो भने त्यसपछि एकजना युवाका लागि धेरैको दाबी थियो । सबै क्षेत्रमा दाबी गर्ने नेता धेरै भए पनि अन्तमा सबैले सहमति गर्न भनेपछि सबै स्थानीय तह समेटिने गरी प्रतिनिधि चयन गरिएको एमाले कालीकोटका प्रचार बिभाग सचिव रमेश सोनीले जानकारी दिनुभयो ।
यस्तै, महिलामा युवा पनि भरखर जेनजीको प्रवेश भएको सोनीको भनाइ छ । टेकवहादुर बुढा पनि पहिलो पटक छनोट हुनुभएको हो । दोहोरिनेमा ब्यासी तिरुवा, कुर्मराज शाही र अध्यक्ष तुलाराज मल्ल छन् ।
