राजमार्ग निर्माण क्षेत्रका रुख हटाइँदै

उर्लाबारी समाचारदाता 

उर्लाबारी, मङ्सिर १४ गते  । राष्ट्रिय राजमार्गको वैकल्पिक सडकका रूपमा निर्माण सुरु भएको मदन भण्डारी राजमार्ग अन्तर्गत कोशी प्रदेश खण्डभित्र पर्ने वन क्षेत्रका रुख हटाउने काम धमाधम भइरहेको छ । 

यसअघि सरकारले रुख काट्ने निर्णय गरे पनि काम सुरु हुन सकेको थिएन । मोरङ खण्डमा साढे नौ किमी सडकले वन क्षेत्रको २०.९४३ हेक्टर जग्गा ओगटेको थियो । मोरङका मिक्लाजुङ, लेटाङ र केराबारी गाउँपालिकामा पर्ने एक हजार ३३३ वटा रुख काटेर निर्माण क्षेत्र खाली गरिसकिएको छ भने झापा, इलाम र सुनसरीमा रुख काट्ने काम धमाधम भइरहेको छ ।   

नेपाल सरकार मन्त्रीपरिषद्को २०८१ साल मङ्सिर ६ गतेको बैठकले निर्णय गरे अनुसार डिपिआर गरिएको क्षेत्रका रुख कटान भएको हो । मदन भण्डारी राजमार्गको धरान–केराबारी, लेटाङ–मधुमल्ला, बेलडाँगी सडकखण्ड, शान्तिनगर–पातापुर र वारफलाङ्फेदी–शान्तिनगर सडकखण्डका रुख कटान नहुँदा मदन भण्डारी राजमार्ग निर्माणको काम रोकिएको थियो ।  

कोशी प्रदेशभित्र पर्ने आयोजनाको निर्माणाधीन १३५.२९ किलोमिटर लम्बाइको यो सडकको अधिकांश क्षेत्र जङ्गलभित्र पर्छ । धरान–केराबारी–लेटाङ–मधुमल्ला–बेलडाँगी  सडकखण्डको ५३ किलोमिटरभित्र पाँच हजार ७८९ वटा रुख थिए । शान्तिनगरदेखि पातापुर सडकखण्डको १३.८७ किलोमिटर क्षेत्रमा तीन हजार ६८९ वटा रुख थिए । भने वारफलाङ्फेदीदेखि शान्तिनगरसम्मको १३  किमी क्षेत्रमा दुई हजार ८८० वटा रुख रहेका छन् । 

मदन भण्डारी राजमार्ग आयोजना दमक कार्यालयका निमित्त कार्यालय प्रमुख सुभाषकुमार दत्तका अनुसार रुख काट्ने बाटो खुलेसँगै राजमार्ग निर्माणको काम तीव्र गतिमा अघि बढेको छ । उहाँका अनुसार हालसम्म आयोजनाको ८४ प्रतिशत भौतिक प्रगति भएको छ । बजेटको अभाव र भुक्तानीमा कुनै समस्या छैन । निमित्त प्रमुख दत्तले १० अर्बभन्दा बढीको ठेक्का सम्झौतामध्ये हालसम्म आठ अर्ब भुक्तान भइसकेको जानकारी दिनुभयो । उहाँका अनुसार यो ७९ प्रतिशत वित्तीय प्रगति हो । चालु आवमा पनि ४९ करोड रुपियाँ विनियोजन भएकाले बजेट अभाव नहुने उहाँको भनाइ छ । 

मदन भण्डारी राजमार्गको कोशी प्रदेश खण्डमा सुनसरीको झँडा चौकदेखि झापाको पातापुरसम्म १३५.२९ किमी लम्बाइ पर्छ । जसमध्ये हालसम्म मोरङखण्डमा २४ किमी, झापामा १२ किमी र सुनसरीमा छ किमी सडक कालोपत्रे भइसकेको छ । 

कमल खोलादेखि सहादतस्थलसम्म २५.३२ किमी किमी सडक अझै ठेक्का लाग्न सकेको छैन । योबाहेक सुनसरी जिल्लामा झन्डै २० किमी, मोरङमा ३६ किमी, झापामा ३४ किमी र इलाममा १२ किमी सडक धमाधम निर्माण भइरहेको छ । निर्माण कम्पनी श्रेष्ठ–मोतीदान जेभीका सञ्चालक प्रह्लाद ढुङ्गानाले निर्माण क्षेत्र खाली भयो भने निर्धारित समयमा काम सक्ने बताउनुभयो । सबैभन्दा ठुलो समस्या सडकको डिपिआरभित्र पर्ने रुख थिए । ती रुख हटाउने काम अन्तिम चरणमा पुगेकाले अब मङ्सिरदेखि असारसम्म तीव्र गतिमा काम हुने ढुङ्गानाले जानकारी दिनुभयो ।