बिजमायालाई नयाँ घर

जुम्ला समाचारदाता

जुम्ला, मङ्सिर १४ गते । हिमपातले घर भत्काएपछि घरबारविहीन भएका जुम्लाको गुठीचौर गाउँपालिका–५, फोइगाउँकी बिजमाया जैसीले नयाँ घर पाउनुभएको छ । छ वर्षपहिले हिमपातले घर भत्किएपछि आर्थिक अभावमा घर बनाउन नसकी बर्सौंदेखि टहरामा बस्नुभएको थियो । सानो काठको टहरामा १२ वर्षकी छोरी र १४ वर्षको छोरासँग उहाँले दुःखका दिन कटाउनुभएको थियो । 

अहिले उहाँको आफ्नै घर निर्माण भएको छ । उहाँ टहरामा बसिरहेको खबर पाएपछि आर्थिक सहयोगका लागि पहल गरिदिन भन्दै पत्रकार दिलामाया शाहीको सम्पर्कमा गएपछि उहाँको घर निर्माणको समन्वय भएको थियो । गाउँपालिकाले एक लाख बजेट सहयोग गरेपछि अहिले बिजमायाको घरको आधार तयार भयो । अहिले उहाँको दुईतले चारकोठे ढुङ्गा र काठको घर निर्माण भएको छ । भान्सा पनि छुट्टै बनेको छ । करिब दुई सय मिटर चौडा जग्गामा फराकिलो घर भएपछि अहिले ठुलो समस्याबाट उहाँले मुक्ति पाउनुभएको छ । 

बिजमायाको घर निर्माण भएपछि त्यहाँ पुग्दा खुसीका आँसु बगाउँदै ऋण थपिए पनि घर निर्माण भएकोमा खुसी व्यक्त गर्नुभयो । उहाँले आफ्नो घर निर्माणमा सहयोग गरेकोमा गाउँपालिका र सरोकारवाला निकायलाई धन्यवाद ज्ञापन गर्नुभयो । घरविहीन बिजमायाको हाल बनेको घरको अवस्था अवलोकन गर्न राष्ट्रिय मानव अधिकार आयोगको टिम पनि पुगेको छ । आयोगका कर्णाली प्रदेश जुम्ला शाखा प्रमुख कल्पना आचार्य नेपालले घर नभएका उहाँको घर निर्माण भएकोमा सरोकारवाला निकायलाई धन्यवाद दिनुभयो । दिमा आमाघर जुम्लाका अध्यक्ष तथा पत्रकार दिलमाया शाहीले सुरुको अवस्थाबाट पार पाउँदै उहाँले नयाँ पक्की घर पाउनुभएकोमा खुसी व्यक्त गर्नुभयो । 

खरको छानोमुक्त विपन्नका घर

शारदा (सल्यान) समाचारदाताका अनुसार आगलागी तथा अन्य विपत्को जोखिम न्यूनीकरणका लागि सल्यानको एउटै पालिकाले एक हजारभन्दा बढी विपन्न घरपरिवारलाई खरको छानाबाट मुक्त गरिदिएको छ । जिल्लाको कालीमाटी गाउँपालिकाले सञ्चालन गरेको अभियानबाट विपन्न परिवारको आवास गुणस्तर सुधारमा महत्वपूर्ण उपलब्धि हासिल भएको हो । यस अभियानले गाउँका विपन्न परिवारको आवास सुरक्षा र जीवनस्तर दुवैमा ठुलो परिवर्तन ल्याएको स्थानीयले बताएका छन् ।

कालीमाटीका एक हजार ७४ अति विपन्न तथा असहाय परिवारलाई निःशुल्क जस्तापाता वितरण गरिएको गाउँपालिकाले जनाएको छ । गाउँपालिकाले आर्थिक वर्ष २०७७/७८ बाट जस्तापाता वितरण कार्यक्रम सुरु गरेको थियो । सुरुमा पाँच वर्षमा एक हजार घरधुरीलाई मात्र जस्तापाता दिने लक्ष्य राखिएको थियो तर लक्ष्यभन्दा बढी एक हजार ७४ परिवारसम्म यो सुविधा पु¥याउन सफल भएको पालिकाले जनाएको छ ।

कार्यक्रम सुरु भएको पहिलो आव २०७७/७८ मा १२७ घरधुरीले जस्तापाता पाएका थिए । त्यसपछि आव २०७८÷७९ मा १७६ परिवारलाई वितरण गरियो । आव २०७९/८० मा सबैभन्दा धेरै ३९० घरधुरीले यो सहयोग पाए । आव २०८०/८१ मा १५७ परिवारले सुविधा लिए भने आव २०८१/८२ मा २२४ घरधुरीलाई जस्तापाता बाँडिएको गाउँपालिकाका सूचना अधिकारी विष्णु भण्डारीले जानकारी दिनुभयो । उहाँका अनुसार सम्बन्धित वडाको सिफारिस एवं आवश्यक मापदण्डका आधारमा जस्तापाता वितरण गरिएको थियो । गाउँपालिका अध्यक्ष दानबहादुर केसीले अधिकांश विपन्न परिवारलाई जस्तापाता वितरण भइसकेको र बजेटको सीमितताका कारण चालु आवमा नियमित रूपमा जस्तापाता वितरणको कार्यक्रम नरहेको जानकारी दिनुभयो ।