डिडिए प्रतिवेदनमाथि परेन उजुरी

मुसीकोट समाचारदाता

रुकुमपश्चिम, मङ्सिर १४ गते । रुकुमपश्चिमको चौरजहारी नगरपालिकामा भूकम्प प्रभावितको विस्तृत क्षति आकलन (डिडिए) प्रतिवेदन उपर उजुरी परेको छैन । राष्ट्रिय विपत् जोखिम न्यूनीकरण तथा व्यवस्थापन प्राधिकरणमार्फत तयार भएको डिडिएको प्रतिवेदन उपर गुनासो तथा उजुरी दर्ता गर्न सकिने व्यवस्था गरिए पनि तोकिएको सीमाभित्र कुनै पनि उजुरी नपरेको चौरजहारी नगरपालिकाका निमित्त प्रमुख प्रशासकीय अधिकृत शेरप्रसाद ढकालले बताउनुभयो । 

यद्यपि पुनर्निर्माणका लागि लाभग्राही कायम हुन आफू योग्य भएकाले पुनः विस्तृत क्षति आकलन गर्नुपर्ने मागसहितका निवेदन दर्ता भएको उहाँले बताउनुभयो । दुई हजार ७२ जनाले पुनः डिडिएका लागि निवेदन दर्ता गराएका छन् । बिहीबार नगरप्रमुख पुष्प वादीको अध्यक्षतामा बसेको स्थानीय तह विपत् व्यवस्थापन समितिको बैठकले ती निवेदन तथा गुनासा सम्बन्धित निकायमा लेखी पठाउने निर्णय गरेको ढकालले जानकारी दिनुभयो । 

यसका साथै बाढीपहिरो र चट्याङले क्षति पुगेका आठ घरपरिवारलाई राहत रकम प्रदान गरिने भएको छ । बैठकले २०८० कात्तिक १७ गते जाजरकोट केन्द्रविन्दु भएर गएको भूकम्पका कारण प्रभावित चार हजार २० परिवारको आवास पुनर्निर्माणका लागि लाभग्राही पहिचान गरी स्वीकृतिका लागि जिल्ला विपत् व्यवस्थापन समितिमा पठाउने निर्णय गरेको निमित्त प्रमुख प्रशासकीय अधिकृत ढकालले जानकारी दिनुभयो । 

गुनासो सुनुवाइ समिति

रुकुमपश्चिमको त्रिवेणी गाउँपालिकाले स्थानीय गुनासो सुनुवाइ समिति गठन गरेको छ । भूकम्प, अन्य विपत् र स्थानीय समस्याको छिटो समाधान गरेर सेवा प्रवाहलाई प्रभावकारी बनाउन यो समितिले काम गर्ने गाउँपालिकाका प्रमुख प्रशासकीय अधिकृत यज्ञबहादुर भण्डारीले जानकारी दिनुभयो । गाउँपालिका अध्यक्ष गणेशकुमार केसीको संयोजकत्वमा गठन गरिएको उक्त समितिको सहसंयोजकमा उपाध्यक्ष राजकुमारी रेउले, सदस्यमा प्रमुख प्रशासकीय अधिकृत यज्ञबहादुर भण्डारी, नेपाल प्रहरीका प्रतिनिधि विजय ओली र सदस्यसचिवमा विपत् फोकल पर्सनमा खिमबहादुर ओली रहनुभएको छ । 

गाउँपालिकाको स्थानीय विपत् व्यवस्थापन समितिको बैठकले चालु आर्थिक वर्षमा विपत् तथा दीर्घरोगका कारण प्रभावित ३२ जनालाई जम्मा तीन लाख पाँच हजार रुपियाँ सहायता प्रदान गर्ने निर्णय गरेको छ । 

त्यसै गरी भूकम्प प्रभावितमध्ये डिडिए प्रक्रिया भई निस्सा तयार भएका व्यक्तिको अद्यावधिक विवरण नआएकाले उपलब्ध गराउन आग्रह गरिएको छ । 

उक्त विवरणका आधारमा आवश्यक पुनर्निर्माण अघि बढाउने गाउँपालिकाले जनाएको छ । त्रिवेणी गाउँपालिकाका खिमबहादुर ओलीका अनुसार जाडो मौसममा हुन सक्ने असर, आगलागी, स्वास्थ्य जोखिमलगायत सम्भावित चुनौती न्यूनीकरणका लागि आवश्यक पूर्वतयारी, समुदायस्तरको सचेतना र समन्वयात्मक कार्ययोजना लागु गर्न गाउँपालिकाले आवश्यक निर्णय गरेको छ ।