दस अर्बको धानचामल आयात

गोरखापत्र समाचारदाता

काठमाडौँ, मङ्सिर १४ गते । चालु आर्थिक वर्ष २०८२/८३ को चार महिनामा १० अर्ब रुपियाँ बराबरको धानचामल आयात भएको छ । भन्सार विभागको तथ्याङ्क अनुसार यस वर्षको साउनदेखि कात्तिकसम्म १० अर्ब १८ करोड ४९ करोड ९० लाख सात हजार रुपियाँ बराबरको धानचामल आयात भएको हो ।

गत वर्ष सो अवधिमा छ अर्ब ९६ करोड ६७ लाख ४७ हजार रुपियाँको धानचामल आयात भएको थियो । गत वर्षकै सोही अवधिको तुलनामा चालु आवमा तीन अर्ब रुपियाँभन्दा बढीको खाद्यान्न आयात भएको हो । स्थानीय उत्पादनले माग धान्न नसक्दा बाहिरी मुलुकबाट ठुलो परिणाममा धानचामल आयात हुने गरेको छ ।

विभागका अनुसार चालु आवको चार महिनामा छ अर्ब ५८ करोड ५८ लाख ९२ हजार रुपियाँ बराबरको आठ करोड ८२ लाख २७ हजार ९१३ केजी चामल आयात भएको छ । यस्तै सोही अवधिमा तीन अर्ब ५९ करोड १७ लाख आठ हजार रुपियाँ बराबरको नौ करोड ६९ लाख १७ हजार २१ केजी धान आयात भएको छ ।

गत वर्ष सो अवधिमा चार अर्ब ३६ करोड ४९ लाख ३० हजार रुपियाँ बराबरको चार करोड ६२ लाख ५८ हजार २५३ केजी चामल आयात भएको थियो । यस्तै दुई अर्ब ६० करोड १८ लाख १७ हजार रुपियाँ बराबरको सात करोड १३ लाख १९ हजार ९९४ केजी धान आयात भएको थियो ।

पछिल्लो समय मसिनो चामल खाने शैलीले गर्दा पनि चामल आयात बढी हुने गर्छ । यो वर्ष बैमौसमी बर्सात र बाढीका कारण धान उत्पादन घट्ने देखिएकाले धानचामलको आयात थप बढ्ने देखिन्छ । भारत, चीन, थाइल्यान्ड, इटाली, इन्डोनेसिया, भियतनामलगायतका देशबाट धानचामल आयात हुने गरेको छ ।

गोरखापत्र अनलाइन