कोकिला ढकाल
इलाम, मंसिर १३ गते । मेची राजमार्ग अन्तर्गत इलामको भञ्ज्याङस्थित मिल गोलाइमा ट्रकले स्कुटरलाई ठक्कर दिँदा दुई जनाको घट्नास्थलमै मृत्यु भएको छ ।
मृत्यु हुनेमा इलाम न.पा.९ गोलबस्ती बस्ने अन्दाजी वर्ष २६ को डेबिट थापामगर र माइजोगमाई गा.पा. १ नयाँबजार घर भई इलाम ७ चोकबजार बस्ने अन्दाजी वर्ष १८ को छेवाङ शेर्पा रहेका छन् । दुवैलाई उपचारका लागि इलाम अस्पताल पुर्याउँदा अस्पतालले मृत घोषणा गरेको थियो ।
उनीहरु दुवै जना इलाम सदरमुकामस्थित ग्रीन भ्याली एकाडेमीका शिक्षक रहेको बताइएको छ । झापाबाट इलामतर्फ आउँदैगरेको प्रदेश १–०१–००१ ख ४१०१ न.को ट्रक र विपरीत दिशातर्फ जादैगरेको प्रदेश १–०१–०१२ प ४८९९ न.को स्कुटर एकआपसमा ठक्कर खाएर दुर्घटना भएको थियो ।
स्कुटरमा सवार शेर्पा र थापा माइखोलामा आयोजित वनभोज कार्यक्रममा सहभागी भएर फर्कंदै गरेको बताइएको छ । ट्रक चालक इलाम न.पा. ५ बिब्ल्याककटे बस्ने वर्ष २५ का रामप्रसाद श्रेष्ठलाई प्रहरीले नियन्त्रणमा लिएको जिल्ला प्रहरी कार्यालय इलामले जनाएको छ ।
