अर्जुन काफ्ले
स्याङ्जा, मङसिर १३ गते । अर्जुनचौपारी गाउँपालिका–१ मा रहेको पञ्चकन्या माध्यमिक विद्यालयमा ३२२ जना विद्यार्थीलाई विद्यालय पोशाक वितरण गरिएको छ ।
विद्यालयमा अध्ययन गरेका २०६५ सालको एसएलसी ब्याचका पूर्व विद्यार्थीले विद्यालयका विद्यार्थीलाई पोशाक वितरण गरेका हुन् ।
देश तथा विदेशमा रहेका २०६५ ब्याचका ८४ मध्ये ४२ जना पूर्व विद्यार्थीले सङ्कलन गरेको दुई लाख ४१ हजार पाँच सय रुपियाँ बराबरको पोशाक वितरण गरिएको हो । यहाँ कक्षा नर्सरीदेखि कक्षा ९ सम्मका सबै विद्यार्थीलाई पोशाक वितरण गरिएको छ ।
कक्षा १०, कक्षा ११ र १२ का विपन्न विद्यार्थीलाई पोशाक वितरण गरिएको पूर्व विद्यार्थी एवं शिक्षक सुरेन्द्र काफ्लेले बताउनुभयो ।
पोशाक वितरणमा गाउँपालिका उपाध्यक्ष सपना गुरुङले सकारात्कम काममा पालिकाको सहयोग रहने बताउनुभयो । कार्यक्रममा विद्यालय व्यवस्थापन समितिका अध्यक्ष मोहनबहादुर अधिकारीले विद्यार्थीको कार्यक्रमले विद्यालयसँग पूर्व विद्यार्थीको सम्बन्धलाई बलियो बनाउने बताउनुभयो ।
कार्यक्रममा प्रधानाध्यापक जितबहादुर थापा, शिक्षक शोभाकान्त पौडेलले धारणा राख्नुभएको थियो ।
