अर्जुन काफ्ले
स्याङ्जा, मङसिर १३ गते । स्वास्थ्य उपचार गराउने भनी घरबाहिर हिड्नुभएका वडाध्यक्ष २७ महिनादेखि सम्पर्कबाहिर रहनुभएको छ । पुतलीबजार नगरपालिका–४ का वडाध्यक्ष शिवबहादुर थापा सम्पर्क बाहिर रहनुभएको हो ।
स्वास्थ्य उपचारका लागि अन्यत्र देशमा जानु पर्ने भएको बताउँदै २०८० भदौ १५ गते वडा सदस्य लिलावती पौडेललाई कार्यवाहकको जिम्मेवारी दिएर थापा बाहिर जानुभएको थियो । २०८०–८१ को चलानी नं १६७ को पत्रमा आफू उपचारका लागि जानुपर्ने भएकाले दैनिक रूपमा उपस्थित भएर कामकाज गर्न नसक्ने भएकाले प्रत्यायोजित अधिकारको दुरुपयोग नहुने गरी कार्यवाहक वडाध्यक्षको जिम्मेवारी प्रदान गरेको पत्र थमाएर थापा हिड्नु भएको थियो ।
जिम्मेवारी दिएर हराउनु भएका थापा अमेरिकामा रहनु भएको बुझिएको छ । कार्यवहाक अध्यक्ष पौडेलका अनुसार उहाँको आउने प्रतिक्षामा आफू पनि रहेको बताउनुभयो । कहिले बिरामी हुँदा, व्यक्तिगत वा घरायसी कारणले केही समय बस्नुपरे पनि जनताको काम रोकिएला कि भन्ने चिन्ता लाग्नेगरेको बताउँदै उपाध्यक्ष पौडेलले वडाकै काममा व्यस्त भएर कतै जाने फुर्सद नपाएको बताउनुभयो ।
प्रशासन, अदालत, नगरपालिका समतेलाई बोधार्थ दिएर वडा सदस्यलाई जिम्मवेरी दिनुभएका थापाको बारेमा नगरपालिकालाई समेत जानकारी नभएको नगरपालिका प्रमुख तुलसीराम रेग्मीले बताउनुभयभो ।
थापा अमेरिका पुगेपछि पालिकाले २०८० भदौदेखि २०८१ असार महिनासम्मको यातायात, पत्रपत्रिका, मोबाइल रिचार्ज, अतिथि सत्कार, समन्वय सहजीकरण, बैठक तथा अनुगमन लगायतमा दुई लाख ७६ हजार १९० रुपियाँ बैँक खातामा सेवा सुविधा भुक्तानी गरेको थियो ।
प्रमुख प्रशासकीय अधिकृत धर्मराज ढुङ्गानाले आफु हाजिर भएसँगै वडाध्यक्ष थापा नगरको सम्पर्कमा नरहेको बताउनुभयो । २०८१ साउनदेखिको सेवा सुविधा रोकिएको उहाँको भनाइ छ ।
थापा नेपाली कांग्रेसबाट वडाध्यक्षमा निर्वाचित हुनु भएको हो । पार्टीसँग कुनै सल्लाह नगरेको नेपाली कांग्रेसका नगर सभापति सुरजकुमार अधिकारीले बताउनुभयो ।
