वेलिङ्टन, मङ्सिर १३ गते । एयर न्यूजिल्यान्डले ३७ वटा एयरबस विमानमा आवश्यक सफ्टवेयर अपडेट लागु गर्नुपर्ने भएपछि १२ उडान रद्द गरेको छ । एयर न्यूजिल्यान्डका प्रमुख सुरक्षा अधिकारी नेथन म्याकग्रोका अनुसार, यो सफ्टवेयर अपडेट समस्या देशभित्र र अन्तर्राष्ट्रिय उडानमा सञ्चालन हुने ३७ वटा एयरबस विमानलाई प्रभावित गरिरहेको छ ।
उहाँले यो अपडेट पूरा गर्न करिब दुईदेखि तीन दिन लाग्ने अनुमान गरिएको बताउनुभएको छ । न्यूजिल्यान्ड नागरिक उड्डयन प्राधिकरणका अनुसार उनीहरू एयरबस ए-३२० विमानको अवस्थाबारे पूर्णरूपमा अवगत छन् र यूरोपेली सङ्घको उड्डयन सुरक्षा एजेन्सीले जारी गरेको आपत्कालीन सुरक्षा निर्देशन कार्यान्वयन गर्न एयर न्यूजिल्यान्ड र अन्य सम्बन्धित निकायसँग मिलेर काम गरिरहेका छन् । यस निर्देशनअनुसार सबै ए-३२० विमानमा आवश्यक सफ्टवेयर अपडेट गर्नु अनिवार्य गरिएको छ । रासस/सिन्ह्वा
