एनपिएल : चितवनले विराटनगरलाई दियो १७५ रनको चुनौतीपूर्ण लक्ष्य

काठमाडौँ, मङ्सिर १० गते । नेपाल प्रिमियर लिग (एनपिएल) मा जितका लागि चितवन राइनोजले विराटनगर किङ्सलाई एक सय ७५ रनको चुनौतीपूर्ण लक्ष्य दिएको छ ।

त्रिभुवन विश्वविद्यालय अन्तर्राष्ट्रिय क्रिकेट रङ्गशालामा टस हारेर पहिले ब्याटिङको निम्तो पाएको चितवनले निर्धारित २० ओभरमा पाँच विकेटको क्षतिमा एक सय ७४ रन बनायो ।

चितवनका लागि रवि बोपराले अर्धशतकीय पालि खेल्नुभयो । उहाँले ३८ बलमा तीन चौका र चार छक्काको सहोगमा सर्वाधिक ६५ रन बनाउनुभयो ।

यस्तै सैफ जईवले ३२, कप्तान कुशल मल्लले अविजित २०, देव खनालले २८ र डेविड मलनले १७ रन बनाउनुभयो । बलिङमा विराटनगरका कप्तान सन्दीप लामिछाने र मर्सेन्ट डे लन्जले दुई दुई तथा शुभम् रन्जनेले एक विकेट लिनुभयो ।

विराटनगर लगातार चौथो जित निकाल्ने तयारीमा छ । अपराजित विराटनगर यसअघिका तीन खेल जितेर ६ अङ्कसहित तालिकाको दोस्रो स्थानमा छ ।

विराटनगर एनपिएलमा अपराजित दोस्रो टोली हो । समान ६ अङ्कसहित सुदूरपश्चिम रोयल्स शीर्षस्थानमा छ । यस्तै चितवन राइनोज आज दोस्रो जित निकालेर प्लेअफ यात्रा जिवित राख्न चाहन्छ ।