काठमाडौँ, असोेज २३ गते । ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले कीर्तिपुर क्रिकेट मैदानको अनुगमन गर्दै नेपाल प्रिमियर लिग (एपपिएल) अगाडि नै रङ्गशाला निर्माण कार्य सम्पन्न गर्ने प्रतिबद्धता जनाउनुभएको छ ।
घिसिङले बिहीबार कीर्तिपुरमा निर्माणाधीन अन्तर्राष्ट्रिय स्तरको क्रिकेट मैदानको अनुगमन गर्नुभएको हो । मन्त्री घिसिङ, शहरी विकास मन्त्रालयका सचिव गोपाल सिग्देल, आयोजना प्रमुख चक्रवर्ती कण्ठ सहितको टोलीले स्थलगत निरीक्षण गरी निर्माण व्यवसायी, नेपाल क्रिकेट सङ्घ (क्यान)का पदाधिकारीलगायतसँग छलफल गरेको थियो ।
रङ्शालाको गुरुयोजना वमोजिम भइरहेको निर्माण कार्यलाई राष्ट्रिय प्राथमिकतामा राखी बजेट अभाव नहुने गरी रङ्शाला विस्तारको दोस्रो चरण अगाडि बढाइने बताउँदै उहाँले सरकार परिवर्तन हुँदैमा निर्माण प्रभावित नहुनेसमेत प्रष्ट पार्नुभयो ।
क्यानका सचिव पारस खड्काले हालको नेपालको संवेदनशील अवस्थामा हुन लागेको एनपिएलले देशभित्र मात्र नभएर अन्तर्राष्ट्रिय रुपमा पनि सकारात्मक सन्देश प्रवाह हुने बताउनुभयो ।
फ्लडलाईट जडान कार्यको प्रगति ६० प्रतिशत रहको छ । रङ्गशालामा ४५ मिटर तथा ६० मिटर अग्ला ६ वटा ३०/३० टनका हाइमास्ट लाइट जडान भइरहेको छ ।
६ वटा मध्ये दुई वटा लाईट टावर ठड्याउने कार्य सम्पन्न भईसकेको छ । वाँकीका उपकरणहरुको आपूर्ति समेत भइसकेको छ ।
