अमरराज नहर्की
तनहुँ, असोज २२ गते । गण्डकी प्रदेशका मुख्यमन्त्री सुरेन्द्रराज पाण्डेले बुधबार जेनजी आन्दोलनका क्रममा क्षतिग्रस्त भएका तनहुँका विभिन्न सरकारी कार्यालयहरूको निरीक्षण गर्नुभएको छ ।
आन्दोलनले गर्दा सेवाप्रवाहमा परेको असरका बारेमा जानकारी लिन मुख्यमन्त्री पाण्डे तनहुँ आइपुग्नुभएको हो । उहाँले जिल्लास्तरीय समन्वय बैठकमार्फत् आन्दोलनपश्चात् कार्यालयहरूमा देखिएका चुनौती र पुनःसञ्चालनका तयारीबारे जानकारी लिनुभएको थियो ।
निरीक्षणका क्रममा मुख्यमन्त्री पाण्डेले प्रमुख जिल्ला अधिकारी रामकृष्ण अधिकारी, जिल्ला प्रहरी प्रमुख टेकबहादुर कार्की लगायतसँग सेवा प्रवाहको अवस्था, जनताले भोगिरहेका कठिनाइ र आवश्यक व्यवस्थापनबारे जानकारी लिनुभएको थियो ।
मुख्यमन्त्री पाण्डेले आन्दोलनका कारण क्षति पुगेका कार्यालयहरूलाई छिटो मर्मत गरी नियमित सेवा प्रवाहमा ल्याउने प्रतिबद्धता जनाउनुभएको बताइएको छ । निरीक्षणको क्रममा गण्डकी प्रदेश सभा सदस्य अशोककुमार श्रेष्ठ, जिल्ला समन्वय समितिका प्रमुख शान्तिरमण वाग्ले, व्यास नगरपालिकाका प्रमुख वैकुण्ठ न्यौपाने लगायत सहभागी हुनुहुथ्यो ।
