इयुको भिटोमाथि हङ्गेरीलाई दबाब दिन ट्रम्पलाई जेलेन्स्कीको आग्रह

किएभ, भदौ ५ गते । युक्रेनी राष्ट्रपति भोलोदिमर जेलेन्स्कीले सोमबार डोनाल्ड ट्रम्पसँगको भेटमा अमेरिकी नेतालाई युरोपेली सङ्घ (इयु)मा सामेल हुन किएभको प्रयासमा हङ्गेरीलाई भिटो हटाउन दबाब दिन आग्रह गरेको बताउनुभयो ।

सन् २०२२ फेब्रुअरीमा रुसले आक्रमण गरेको केही दिनपछि युक्रेनले इयुमा प्रवेशका लागि आवेदन दिएको थियो, तर हङ्गेरीका राष्ट्रवादी प्रधानमन्त्री भिक्टर ओर्बनले लगाएको भिटोका कारण वार्ता अघि बढ्न सकेन । “मैले राष्ट्रपति ट्रम्पलाई बुडापेस्टले इयुमा हाम्रो प्रवेश रोक्न हुँदैन भनेर सोधेँ”, जेलेन्स्कीले बिहीबार एएफपीसहित पत्रकारहरूलाई जारी गरेको टिप्पणीमा भन्नुभयो, “राष्ट्रपति ट्रम्पले आफ्नो टोलीले यसमा काम गर्ने वाचा गर्नुभएको छ ।”

इयुमा मस्कोको नजिकको सहयोगी हङ्गेरीले युक्रेनको प्रवेशले सुरक्षा जोखिम निम्त्याउने र युद्धको बेला देशलाई स्वीकार गर्दा बुडापेस्टलाई रुससँगको द्वन्द्वमा तान्ने बताएको छ । युक्रेनले हङ्गेरीको चिन्ता आधारहीन रहेको जनाएको छ । “युक्रेन इयुमा सामेल हुन चाहन्छ भन्ने कुरा पूर्णतया उचित छ यो हाम्रो सार्वभौम अधिकार हो”, जेलेन्स्कीले भन्नुभयो ।

युद्ध सुरु भएदेखि दुई देशबिचको सम्बन्ध नाटकीय रूपमा बिग्रिएको छ । ओर्बनले युक्रेनलाई सैन्य सहायता पठाउन अस्वीकार गर्नुभएको छ । यद्यपि युद्ध ग्रस्त देशमा इयुको सहायताको केही भाग अवरुद्ध भएको छ । जुलाईमा हङ्गेरीले युक्रेनमा सैन्य भर्ती कर्ताले कथितरूपमा आक्रमण गरेपछि एक जातीय हङ्गेरी व्यक्तिको मृत्यु भएको दाबी गरेपछि युक्रेनका राजदूतलाई बोलाएको थियो । रासस/एएफपी