अविनाश चौधरी
धनगढी, भदौ ५ गते । मोहना नदीले खेतीयोग्य जमिन कटान गर्न थालेपछि किसान चिन्तित भएका छन् । कैलारी गाउँपालिका –३ स्थित खोनपुर र शिवरत्नपुर गाउँका किसान चिन्तित् भएका हुन् ।
नदीले दुबै गाउँतर्फ कटान गर्दैआएको छ । अहिलेसम्म धेरै किसानको खेतीयोग्य जमिन कटान गरिसकेको जनाइएको छ । किसानका अनुसार यसवर्ष नदीमा अहिलेसम्म ठुलो बाढी आएको छैन । तर, जमिन कटान भने हुँदैआएको छ ।
“नदीले धेरै कटान गरिसक्यो” शिवरत्नपुरका कमल चौधरीले भन्नुभयो, “कटानले गाउँसमेत जोखिममा परिरहेको छ ।” केही वर्ष अगाडि मात्र शिवरत्नपुरमा नदीले कटान गर्दा केही परिवारको उठीबास भएको थियो । नदीले फेरि कटान गर्न थालेको चौधरीले बताउनुभयो । उहाँले तीन बिघासम्म खेतीयोग्य जमिन कटान भइसकेको बताउनुभयो । “अब बाटो कटान भइरहेको छ” चौधरीले भन्नुभयो ।
यसैगरी, अर्कोतिर नदीले खोनपुरको खेतीयोग्य जमिन कटान गरिरहेको छ । नदीले किसानका लगभग ३५ बिघा जमिन कटान गरिसकेको जनाइएको छ । कटान गर्दै मोहना नदी नर्सरीसम्म पुगिसकेको वडा अध्यक्ष सन्तराम चौधरीले जानकारी दिनुभयो । उहाँले कटान नियन्त्रण गर्न पालिकाको बजेटले सम्भव नरहेको जनाउँदै प्रदेश सरकारले तटबन्ध निर्माणका लागि सहयोग गर्नुपर्ने औंल्याउनुभयो ।
“पालिकाको बजेटले सम्भव छैन । थोरै बजेटले कटान नियन्त्रण हुँदैन” वडा अध्यक्ष चौधरीले भन्नुभयो, “भौतिक तटबन्ध निर्माणका लागि प्रदेश सरकारले सहयोग गर्न आवश्यक छ ।”
