काबुल, भदौ ४ गते । अमेरिकाले आफ्ना नागरिकलाई अफगानिस्तान यात्रा नगर्न पुनः आग्रह गर्दै गम्भीर सुरक्षा खतरा र अनुचित रूपमा पक्राउ पर्ने सम्भावना रहेको स्पष्ट पारेको छ ।
मंगलबार जारी विज्ञप्तिमा अमेरिकी परराष्ट्र मन्त्रालयले अफगानिस्तानलाई उच्च जोखिमयुक्त देशको सूचीको शीर्ष स्थानमा राखेको छ । मन्त्रालयले अफगान नागरिकमा अमेरिकीलाई मनपरीरूपमा नियन्त्रणमा लिने सम्भावना उच्च रहेको भन्दै विशेष खतरा सूचक (डी जोखिम संकेत) प्रयोग गरेको हो ।
यससँगै बर्मा, इरिट्रिया, इरान, निकारागुवा, उत्तर कोरिया, रुस र भेनेजुएला पनि त्यस्ता देशमा परेका छन्, जहाँ अमेरिकाका नागरिक जोखिममा पर्ने सम्भावना रहेको जनाइएको छ । खामा प्रेसका अनुसार, तालिवान पक्षद्वारा केही अमेरिकी नागरिकलाई पक्राउ गरिएको घटनापछि अमेरिकाको चिन्ता झन् बढेको छ ।
अमेरिकाले आफ्ना नागरिकलाई कुनै पनि हालतमा अफगानिस्तान नजान आग्रह गर्दै, यात्रा योजनामा पुनर्विचार गर्न भनिएको छ । मन्त्रालयले यसअघि नै अफगानिस्तानमा आतङ्कवाद, अपहरण, गृह अशान्ति र मनपरी गिरफ्तारी जस्ता बहुपक्षीय खतरा रहेको उल्लेख गर्दै यात्रा चेतावनी जारी गरिसकेको थियो ।
सन् २०२१ यता अमेरिकाको काबुलस्थित दूतावास बन्द भएकाले त्यहाँ कन्सुल सेवा उपलब्ध नभएको पनि स्मरण गराइएको छ । यसका साथै, अमेरिकाले केन्यामा पनि आतङ्ककारी हमला हुन सक्ने भन्दै आफ्ना नागरिकलाई उच्च सतर्कता अपनाउन सुझाव दिएको छ । ती समूहले होटल, बजार, धर्मस्थल, विद्यालयलगायत विदेशीको आवतजावत हुने स्थानमा कुनै पनि बेला आक्रमण गर्न सक्ने चेतावनी दिइएको छ । रासस/एएनआई
