तेहरान, भदौ ४ गते । हालैको १२ दिने युद्धमा प्रयोग गरिएका भन्दा बढी क्षमताका मिसाइल विकास गरेको घोषणा गर्दै इरानले बुधबार कुनै पनि नयाँ इजरायली आक्रमणका लागि तयार रहेको बताएको छ ।
“१२ दिनको युद्धमा प्रयोग गरिएका मिसाइल केही वर्षअघि निर्माण गरिएका थिए”, रक्षामन्त्री अजिज नासिरजादेहले आधिकारिक इरना समाचार एजेन्सीलाई उद्धृत गर्दै भन्नुभयो, “आज हामीसँग अघिल्ला मिसाइल भन्दा धेरै क्षमतायुक्त मिसाइल छन्, र यदि यहुदीवादी दुश्मनले फेरि आक्रमण सुरु गर्यो भने हामी निश्चय तिनलाई प्रयोग गर्ने छौँ ।”
जुन महिनाको मध्यतिर इजरायलले इरानविरुद्ध बम आक्रमण अभियान सुरु गरेपछि युद्ध चर्किएको थियो । त्यसको जवाफमा इरानले मिसाइल र ड्रोन आक्रमण गरेको थियो । इजरायली आक्रमणमा वरिष्ठ सैन्य कमान्डर, आणविक वैज्ञानिकसहित सयौँ मानिस मारिएका थिए । आक्रमण सैन्य आधार र आवासीय दुवै क्षेत्रमा गरिएको थियो ।
संयुक्त राज्य अमेरिका पनि केही समयका लागि इरानी आणविक सुविधामाथि आक्रमण गर्दै युद्धमा संलग्न भएको थियो । जुन २४ देखि इरान र इजरायलबिच युद्धविराम कायम छ । तर तेहरानले युद्ध खोजेको नभए पनि कुनै पनि द्वन्द्वका लागि तयार रहेको प्रष्ट पार्दै इरानी अधिकारीले अर्को चरणको लडाइँ कुनै पनि क्षण सुरु हुन सक्ने चेतावनी दिएका छन् ।
सोमबार प्रथम उपराष्ट्रपति मोहम्मद रेजा आरेफले इरान ‘टकरावका लागि हरेक क्षण तयार’ रहनुपर्ने बताउनुभयो । उहाँले भन्नुभयो, “हामी युद्धविराममा छैनौँ; हामी शत्रुताको अन्त्यको अवस्थामा छौँ ।” इरानी मिडियाका अनुसार सेनाले बिहीबार दुई दिने सैन्य अभ्यास सुरु गर्ने छ । यसमा छोटो र मध्यम दूरीका क्रुज मिसाइलको विस्तृत शृङ्खला समावेश हुने छ । पश्चिमी मुलुकले बारम्बार इरानको क्षेप्यास्त्र कार्यक्रमलाई क्षेत्रीय सुरक्षाका लागि खतरा भन्दै चिन्ता व्यक्त गरेका छन् ।
जुलाईमा फ्रान्सले तेहरानसँग यसको आणविक कार्यक्रम मात्र नभई क्षेप्यास्त्र कार्यक्रम र क्षेत्रीय महत्वाकांक्षा समेट्ने ‘व्यापक सम्झौता’ गर्न आह्वान गरेको थियो । तर इरानले आफ्नो सैन्य क्षमतालाई वार्ताका लागि प्रस्तुत गर्न अस्वीकार गर्दै यसलाई आफ्नो रक्षा अधिकारको हिस्सा भएको दोहोर्याएको छ । रासस/एएफपी
