कालीकोट समाचारदाता
कालीकोट, साउन २९ गते । कालीकोटका स्थानीय सरकारले विकास गर्यौं भनेर प्रचार गरिएका ग्रामीण सडक बर्सात सुरु भएसँगै प्रयोगविहीन भएका छन् ।
एक्साभेटर मालिकलाई रोजगारी दिन र फलानो ठाउँको सडक निर्माण सम्पन्नसँगै गाउँमा मोटर पुग्यो भनेर माला लगाउने सरकारका प्रतिनिधि र ताली बजाउने समर्थकको भेला पार्ने सडक अहिले बर्खा लागेपछि पूरै बन्द भएका छन् ।
जिल्लाका नौ स्थानीय तहमध्ये सात स्थानीय तहका केन्द्रसम्म मोटरबाटो पुगेको तथ्याङ्क छ तर बर्खा लागेसँगै ती सडक सबै बन्द हुने गरेका छन् । जिल्लाको शुभकालिका गाउँपालिका, नरहरिनाथ गाउँपालिका, सान्नीत्रिवेणी गाउँपालिका, रास्कोट नगरपालिका, तिलागुफा नगरपालिका, पलाँता गाउँपालिका, खाँडाचक्र नगरपालिकाको केन्द्रमा गाडी पुग्ने गरेका छन् ।
तर बर्सातको समयमा रास्कोट नगरपालिका, तिलागुफा नगरपालिका र खाँडाचक्र नगरपालिकाबाहेकका केन्द्रमा गाडी पुग्न मुस्किल हुने गरेको स्थानीय बताउँछन् । स्थानीय तहका केन्द्रसँगै ग्रामीण बस्तीमा पनि मोटर बाटो पुगेको स्थानीय सरकारका वार्षिक प्रतिवेदनमा उल्लेख छन् तर ती ग्रामीण सडक उद्घाटनपछि पूर्ण रूपमा बन्द छन् । शुभकालिका गाउँपालिका–२ र ३ को सडक उद्घाटन भएको सात वर्ष भए मुस्किलले छ महिना मात्र गाडी चलेको स्थानीयको भनाइ छ । शुभकालिका–३ का किरण अधिकारीले सडक खनिएपछि बाह्रैमहिना गाडी नचलेको बताउनुभयो । दसैँ होस् या अन्य चाडपर्वमा घर जाँदा सेरीघाटदेखि तीन घण्टाको उकालो पैदल हिँड्नु परेको उहाँले जनाउनुभयो । सडक खुलेको सात वर्ष भइसकेको भए पनि यहाँ जम्माजम्मी छ महिना जति सडक चलेको अधिकारीले सुनाउनुभयो । गाउँपालिका केन्द्र जाने सडकको हालत पनि उस्तै हो । सान्नीत्रिवेणी गाउँपालिका केन्द्र र सहायक सडकको अवस्था उस्तै छ । स्थानीय निलो केसीले माघ फागुनतिर कहिलेकाहीँ बोलेरो आउँछन्, त्यसपछि मङ्सिर पुससम्म पूरै बन्द हुने गरेको उहाँले बताउनुभयो ।
गाउँपालिका केन्द्रबाट आउने सडक सान्नीगाढमा पानी बढ्ने भएकाले पूर्ण रूपमा बन्द भएको केसीले जनाउनुभयो । जिल्लाका तीन नगरपालिकामा भने जसोतसो केन्द्रसम्म गाडी जहिले पनि पुग्ने गरेका छन् । नगरपालिकाभित्रका ग्रामीण सडक भने असारको पहिलो हप्तादेखि बन्द भएर मङ्सिरको अन्तिमसम्म ठप्प हुने गरेका छन् ।
