बाजुरा समाचारदाता
बाजुरा, साउन २९ गते । बाजुराको बुढीगङ्गा नगरपालिका–१, अम्कोटका बाढीपहिरोपीडितले घर निर्माण गर्न थालेको झन्डै चार वर्ष भयो । आर्थिक वर्ष २०७९/८० मा स्थानीय, प्रदेश र सङ्घीय सरकारको सहयोगमा यहाँका स्थानीयले घर निर्माणको काम सुरु गरेका थिए ।
बाढीपहिरोबाट विस्थापित भएका अम्कोटका स्थानीयलाई स्थापित गर्ने गरेर आवास कार्यक्रम सुरु गरिएको थियो । सुरु गरेको झन्डै चार वर्ष पुग्दा पनि घर निर्माण भने अझै हुन सकेका छैन । घर बनाउन केही पैसा दियो । हामीले पनि त्यही पैसाले घर निर्माणको काम सुरु गरेका हौँ । कसैले घर निर्माणको काम सम्पन्न गरेका छन् भने कोहीले बाँकी पैसा नदिएकाले घरका जग राखेर अधुरो नै छोडेका छन् ।
बुढीगगा नगरपालिका–१, अम्कोटका कल्धरी नेपालीले भन्नुभयो, “घर बनाऊ त्यसपछि पैसा दिन्छौँ । घर नबनाएर पैसा कसरी दिने त्यसैले पहिलो किस्ता लिएकाले घर बनाउने काम सम्पन्न गर्ने अनि मात्र पैसा भुक्तानी गर्ने भन्यो । हामीले पनि त्यही अनुसारका घर निर्माणको काम सुरु गरेको हौँ तर अहिले भने अनुसारको घर निर्माण गरिएको छैन ।”
घर निर्माणका लागि सुरु गर्न पहिला ५० हजार पाएको हो । त्यही पैसाले घर निर्माणको काम सुरु गरेकी थिएँ । पछि दिने भनेको थियो तर अहिलेसम्म दिएको छैन ।
बाढीपहिरोबाट विस्थापित भएका अम्कोट झन्डै १०६ घरपरिवारमध्येकै ८५ जनाले ७५ हजार पहिलो किस्ता रकमसमेत पाएका छन् । पहिलो किस्ता रकम पाएका ८५ जनामध्ये १८ जनाले मात्र घर निर्माणको काम सुरु गरेका छन् भने ६७ जनाले अझै घर निर्माणको काम सुरु गरेका छैनन् । अन्य स्थानीय पनि प्राविधिकले भनेकै अनुसार घर निर्माण गरेको भए पनि अहिलेसम्म दोस्रो किस्ता रकम नमिलेपछि आवास कार्यव्रmम अलपत्र परेको बताउँछन् ।
प्राविधिककै लापर्बाहीले बाढीपहिरोबाट विस्थापित भएकाको घर निर्माणको काम अलपत्र परेको बुढीगङ्गा नगरपालिका–१, अम्कोटका स्थानीय अर्जुन पाध्यायले बताउनुभयो ।
बाढीपहिरोबाट प्रभावित भएका अम्कोटका स्थानीयको घर निर्माणकै लागि एक जना प्राविधिक नियुक्ति गरेर दैनिक काममा पठाएको बुढीगङ्गा नगरपालिका–१ का अध्यक्ष रणबहादुर थापाले बताउनुभयो । उहाँले भन्नुभयो, “अम्कोटका स्थानीयले प्राविधिकले दिएको डिजाइन स्टिमेट अनुसारको घर निर्माण नगरेपछि पछिल्लो किस्ता रोकिएको हो ।”
अहिले यहाँका बारेमा कार्यपालिकाको बैठक बसेर घर निर्माणको काम सुरु गर्ने निर्णय भएको छ । बर्खाको समय काम गर्न समस्या हुने भएकाले केही दिनपछि यहाँका बाढीपहिरोपीडितको घर निर्माणको काम सुरु हुने थापाले बताउनुभयो ।
स्थानीय १५, प्रदेश २० र सङ्घीय सरकारबाट ६५ प्रतिशत रकम गरेर एक परिवारलाई झन्डै पाँच लाख रुपियाँ दिनुपर्ने हो ।
