जनार्जन खत्री
सर्लाही, साउन २९ गते । पूर्वपश्चिम राजमार्गअन्तर्गत बाँके–लक्ष्मीनियाँ जङ्गल क्षेत्रबाट बुधबार राति मारेको छ वटा दुम्सीसहित चार जना पक्राउ परेका छन् ।
डिभिजन वन कार्यालय सर्लाहीका प्रमुख (डिएफओ) सन्तोषकुमार झाको टोलीले राजमार्गमा यात्राको क्रममा दुईवटा मोटरसाइकलमा लिएर हिँड्दैगरेको अवस्थामा माउ र बच्चा गरी छ वटा मारेको दुम्सीसहित चार जनालाई पक्राउ गरेको हो । दुम्सीको शिकारमा प्रयोग भएको कोदालो, बेल्चा, खन्ती र हँसिया वन प्रमुखसहितको टोलीले नियन्त्रणमा लिएको जनाएको छ ।
उक्त क्षेत्र महोत्तरीतर्फ पर्ने भएकाले पक्राउ परेका व्यक्ति, मारेको दुम्सी, मोटरसाइकल र हतियार बुधबार राति नै सवडिभिजन वन कार्यालय लक्ष्मीनियाँ महोत्तरीमा बुझाइएको सर्लाहीका डिभिजन वन प्रमुख झाले बताउनुभयो । लक्ष्मीनियाँमा प्रारम्भिक बयान लिँदा उक्त दुम्सी धनुषाको जङ्गल क्षेत्रमा मारेको बताएपछि महोत्तरीले फेरि धनुषा वन कार्यालयलाई बुझाएको छ ।
डिभिजन वन कार्यालय धनुषाका प्रमुख बेचन चौधरीले आफूहरुले समेत सोधपुछ गर्दा महोत्तरीकै जङ्गलमा दुम्सी मारेको खुल्न आएकाले पक्राउ परेका व्यक्तिसहितलाई बिहीबार पुनः महोत्तरी वन कार्यालयमा बुझाउने तयारी भइरहेको बताउनुभयो । पक्राउ परेका व्यक्ति यसै क्षेत्रका नट समुदायका रहेको हुनसक्ने वन कर्मचारीले बताएका छन् ।
उनीहरु विदेशी नागरिक भएमा थप कडा किसिमको कारवाही हुने धनुषाका डिएफओ चौधरीले बताउनुभयो । मानिसको चहलपहल कम हुने सर्लाहीको फूलजोर चोकदेखि पूर्व र महोत्तरीको बर्दिवासदेखि पश्चिमतर्फको घना जङ्गल क्षेत्रमा वन्यजन्तुको चोरी, शिकारी हुँदैआएको छ ।
