बाजुरा समाचारदाता
बाजुरा, साउन २९ गते । बाजुरामा मार्तडी कोल्टी सडक २०५४ देखि निर्माणको काम सुरु भएको थियो । पूर्वाधारको क्षेत्रमा काम गर्दै आएको तत्कालीन जिल्ला समिति बाजुरामार्फत एक संस्थाले सो सडक चामल कार्यक्रममा निर्माणको काम सुरु गरेको थियो ।
संस्थाले मार्तडीदेखि कोल्टी पिलीचौर हुँदै कबाडीसम्मको झन्डै ६५ किलोमिटर कच्ची सडक निर्माणको काम गरेको थियो । तत्कालीन जिल्ला समितिले अस्याथी रूपमा निर्माण गरेको यो कच्ची सडकमा २०६३/६४ साल फागुन/चैतदेखि ट्याक्टर सञ्चालनमा आएका थिए । त्यसै २०७२ सालदेखि यसै सडकमा जिप, गाडी सञ्चालन भएका थिए । त्यसपछि यो सडकलाई डबल कटिङ तथा कालोपत्रेका लागि २०७८ सालको असारमा काम गर्ने गरेर २०७६ असारमा ठेक्का लागेको थियो ।
अहिले मार्तडीदेखि चुथीसम्मको नौ किलोमिटर सडक पक्की गर्ने काम गरेको भए पनि ढम्कनेदेखि कोल्टीसम्मको ३१ किलोमिटर सडक कालोपत्रे गर्ने काम भने अझै हुन सकेको छैन । ठेकेदारको लापर्बाहीका कारण सो सडक निर्माणको काममा निकै ढिलाइ भएपछि अहिले यो सडक अलपत्र परेको छ । मार्तडीदेखि कोल्टीसम्मको ४० किलोमिटर सडक कालोपत्रे गर्न ८५ करोड रुपियाँमा ठेक्का लिने कम्पनीले ३५ करोडभन्दा बढी पहिलो किस्ता रकम भुक्तानी लिएका छन् ।
यहाँका स्थानीयलाई भने सडकको काम पूरा नहुँदा कोल्टीदेखि मार्तडीसम्म आउजाउ गर्न निकै सास्ती खेप्दै आउनु परेको छ । साथै यहाँको बाउली अनाईखोला र दानसाँगु खोलामा पक्की पुल निर्माण नहुँदा मार्तडीदेखि कोल्टी चल्ने सवारीसाधन मार्तडी रोकिने गरेकाले यहाँका स्थानीयलाई बर्खाको समय कोल्टीदेखि मार्तडी र मार्तडीदेखि कोल्टीसम्म आउजाउ गर्न निकै सास्ती खेप्नु परेको स्वामीकार्तिक खापर गाउँपालिकाकी जौकला बुढाले बताउनुभयो ।
ठेकेदार कम्पनीले भने काम सुरु भइरहेको तर अविरल वर्षाका कारण केही महिना काम रोकिए पनि आगामी भदौदेखि पुनः सुरु गर्ने जनाएको छ । मार्तडी कोल्टी सडक निर्माणका लागि दुई÷चार पटकमा नै जिल्ला प्रशासन कार्यालयमा नै सर्वदलीय बैठक बसेको थियो तर त्यसले पनि निकास दिएन । जिल्ली सडकमा गएको पहिरोलाई यहाँका बडीमालिका र बुढीनन्दालगायतका दुई नगरपालिकासम्म समन्वय गरेर केही दिनभित्रै सफा गर्ने तयारी भइरहेको छ भने ढम्कनेदेखि कोल्टीसम्मको सडक निर्माणका लागि ठेकेदार कम्पनीलाई भनिएको छ । हिउँदमा ठेकेदार पक्षले काम गरिरहेको थियो । अहिले पानी परेका कारण सडक निर्माण गर्न गाह्रो भएको बताउँदै सडक पूर्वाधार विकास कार्यालय अछामका प्रमुख जङ्गबहादुर थापाले पानी रोकिनेबित्तिकै फेरि काम सुरु गर्ने बताउनुभयो ।
