धर्बेन्द्र झा
जनकपुरधाम, साउन २८ गते । मधेशको राजधानी जनकपुरधाममा पहिलो पटक मुटुरोग सम्बन्धी सम्पूर्ण सेवा प्रदान गर्ने उद्देश्यसाथ सुविधा सम्पन्न आरोग्य निकेतन अस्पताल सञ्चालनमा आउन लागेको छ ।
अस्पताल सञ्चालन विषयमा बुधबार जनकपुरधाममा आयोजना गरिएको पत्रकार सम्मेलनमा उक्त अस्पतालका अध्यक्ष डा. गोराङ्ग मिश्राले निजिस्तरवाट जम्मा २० करोडको लगानीमा बिहीबारबाट सञ्चालनमा आउन लागेको अस्पतालको एक कार्यक्रमबिच मधेश प्रदेशका मुख्यमन्त्री सतिशकुमार सिंहले उद्घाटन गर्ने कार्यक्रम रहेको जानकारी दिनुभयो ।
सय वेड क्षमताको उक्त अस्पतालमा मुटु रोगसम्बन्धी सेवासहित अन्य सेवाहरु दक्ष चिकित्सकबाट प्रदान गरिने उहाँले बताउनुभयो । उहाँले अस्पतालमा सरसफाईदेखि अस्पालबाट प्रदान हुने सेवाबाट नागरिक सन्तुष्ट हुने बताउनुभयो ।
अध्यक्ष डा. मिश्राले मुटु रोगको समयमा उपचार नहुँदा दिनहु दर्जनौ मान्छे मर्ने गरेको र जनकपुरधाम मधेश प्रदेशको राजधानी हुँदा पनि विस्तृत मुटु परीक्षणको अवस्था यस क्षेत्रमा नरहेको कारण पनि धेरैजसो मान्छे विरामी पर्दा उपचारकै अभावमा ज्यान गुमाउनु परेका कारण पनि यस क्षेत्रमा मुटुरोगसम्बन्धी सेवा प्रदान गर्ने उद्देश्यले अस्पताल सञ्चालनमा आउन लागेको बताउनुभयो ।
भवन निमार्णमा ८ करोड र उपकरण खरिदमा १२ करोडको लगानी रहेको उक्त अस्पतालले स्वास्थ्य क्षेत्रको समस्या समाधानका लागि ठुलो मद्दत पुग्ने विश्वास व्यक्त गर्नुभयो । उपचार गराउने विरामीसँग अस्पताल प्रशासनले राम्रो व्यवहार गर्नुको साथै हाम्रो समाजलाई सुहाउने किसिमले अस्पतालबाट प्रवाह हुने सेवाको शुल्क निर्धारण हुने बताउनुभयो ।
