विदुर आचार्य
चौतारा, साउन २८ गते । रसुवागढीस्थित मितेरी पुल बगाएपछि चीनतर्फ रोकिएका १७३ जना नेपालीलाई बुधबार तातोपानी नाका हुँदै नेपाल फर्काइएको छ ।
तातोपानीको कोदारी नजिक इको पहिरोका कारण सडक अवरुद्ध भए पनि उद्धार टोलीले वैकल्पिक व्यवस्था गरी उनीहरूलाई नेपाल ल्याएको नेपाल हिमालयन सीमापार वाणिज्य संघका सचिव आङदोर्जे शेर्पाले जानकारी दिनुभयो ।
बाढीले मितेरी पुल बगाएपछि रसुवागढी नाका बन्द हुँदा नेपाल फर्कन नसकेका नेपालीहरूलाई चीन सरकारले गाडीको व्यवस्था गरी नेलाम हुँदै तातोपानी मितेरी पुलसम्म ल्याएको थियो । उनीहरूको स्वागत नेपाल हिमालय सीमापार वाणिज्य संघ, उद्योग वाणिज्य महासंघ, सरकारका प्रतिनिधि तथा सुरक्षाकर्मीहरूद्वारा गरिएको थियो ।
नेपाल फर्काइएका नेपालीहरूलाई निःशुल्क बसमार्फत राजधानी काठमाण्डौ पठाइएको छ । उनीहरूको जिम्मा नेपालतर्फका कोदारी अध्यागमन कार्यालय, स्थानीय प्रशासन, नेपाल प्रहरी र सशस्त्र प्रहरीले लिएका छन् । चीनतर्फका सरकारी अधिकारीहरूले नेपाली नागरिकहरूलाई औपचारिक रूपमा नेपाल पक्षलाई बुझाएका हुन् ।
यसअघि साउन ७ गते पनि चीनले २०३ जना नेपाली नागरिकलाई तातोपानी नाकाबाट नेपाल फिर्ता गरेको थियो । तीमध्ये धेरैजसो चालक, सहचालक र व्यापारिक फर्मका कर्मचारी थिए ।
यसपटक भने केरुङ क्षेत्रमै विभिन्न पेशा गरिरहेका नेपालीहरू स्वास्थ्य समस्या भोग्न थालेपछि र दीर्घकालीन रोकावटको डर व्यक्त गरेपछि उद्धार गरिएको हो । रसुवागढी नाका अझै पूर्ण रूपमा बन्द छ भने तातोपानी नाका पनि पहिरोका कारण पूर्ण सञ्चालनमा आउन सकेको छैन । सडक सञ्चालनका लागि नेपाल सरकार, सीमापार संघ र उद्योग वाणिज्य महासंघको सहकार्यमा निरन्तर प्रयास भइरहेको बताइएको छ ।