.jpg)
लक्ष्मी चौधरी
जनकपुरधाम, साउन २८ गते । मधेश प्रदेश प्रहरी कार्यालयको नवनिर्मित भवन उद्घाटनका लागि प्रधानमन्त्री केपी शर्मा ओली शुक्रबार जनकपुरधाम आउन लाग्नुभएको छ । जनकपुरधाममा अवस्थित प्रदेश प्रहरी कार्यालयको नवनिर्मित भवन उद्घाटनका लागि प्रधानमन्त्री ओली साउन ३० गते जनकपुरधाम आउन लाग्नुभएको हो ।
करिब २३ करोड १० लाख ४३ हजार ४०७ रुपियाँको लागतमा बनेको यो सुविधासम्पन्न भवनमा ६८ वटा कोठा छन् । गृह, सञ्चार तथा कानुन मन्त्रालयका प्रवक्ता गणेश नायकका अनुसार भवन निर्माणको जिम्मेवारी शिवालय सुवेदी जेभीलाई २०८० असोज १० गते दिइएको थियो, जसको सम्झौता अवधि २०८२ असार मसान्तसम्मको थियो । मन्त्रालयअन्तर्गत सो भवनको निर्माण कार्य समयमै सम्पन्न भएको मन्त्रालयका पदाधिकारीले जनाउनुभएको छ ।
भवन निर्माण सम्पन्न भएपछि प्रहरी प्रशासनिक कार्य दक्षता वृद्धि हुने, प्रदेशस्तरीय अपराध नियन्त्रण तथा अनुसन्धान क्षमतामा सुधार आउने र प्रहरी सेवाप्रति जनविश्वास बढ्ने अपेक्षा गरिएको छ ।
प्रधानमन्त्री ओलीको भ्रमणलाई दृष्टिगत गर्दै जनकपुरधाममा सुरक्षा व्यवस्था कडा पारिएको छ । कार्यक्रममा आवश्यक तयारी अन्तिम चरणमा पुगेको मधेश प्रदेश प्रहरी कार्यालयले जनाएको छ। प्रदेश प्रहरीलाई आफ्नै कार्यालय मिल्नु प्रदेशको सुरक्षा व्यवस्था सुदृढ गर्ने महत्वपूर्ण पूर्वाधारको रूपमा लिइएको छ । यसले प्रदेशस्तरीय अपराध नियन्त्रण, अनुसन्धान क्षमता र प्रहरी सेवामा जनविश्वास बढाउने अपेक्षा गरिएको छ ।
