रामकृष्ण बोहरा
बागलुङ, साउन २८ गते । कालीगण्डकी करिडोरअन्तर्गत बागलुङ–बलेवा खण्डको कालाखोलामा सुख्खा पहिरो खस्दा सवारी आवातजावत ठप्प भएको छ । करिडोरअन्तर्गत बागलुङ नगरपालिका –१३ को कालाखोलामा बुधबार बिहानै सुख्खा पहिरो खसेको हो ।
यसअघि शनिबार दिउँसो खसेको पहिरोले अवरुद्ध करिडोर सडक बुुधबार बिहान मात्र खुलेको थियो । चट्टानसहितको पहिरोले सडक अवरुद्ध छ । सदरमुकाम बागलुङ बजारबाट दक्षिण क्षेत्र जोड्ने बागलुङ–कुश्मीशेरा सडक यसअघिनै पहिरोका कारण अवरुद्ध छ । करिडोरमा पहिरो खसेपछि जिल्लाको दक्षिण क्षेत्रसँग सडक सम्पर्क टुटेको हो ।
करिडोर अवरुद्ध हुँदा बागलुङबाट गुल्मी, स्याङ्जा, पाल्पा, रुपन्देही हुँदै पश्चिम चल्ने सबै सवारीसधान चल्न सकेका छैनन् । सोही बाटो हुँदै उत्तर मुस्ताङसम्म चल्ने सवारी साधन र भैरहवाबाट सामान बोकेर आएको मावाहक ट्रकहरु कालाखोलामा रोकिएका छन् । पहिरो निरन्तर झरिरहेको र वर्षा पनि नरोकिएकाले सडक खुलाउन कठिन भएको जिल्ला ट्राफिक प्रहरी प्रमुख गङ्गाराम बिकले जानकारी दिनुभयो ।
करिडोरको मालढुङ्गा–बलेवा विमानस्थल खण्ड कालोपत्रको काम गरिरहेको बिडारी निर्माण सेवाले पहिरो पन्छाउन थाले पनि पहिरो खस्न नरोकिएकाले समय लागेको बताइएको छ । कालाखोला पहिरोले सडक अवरुद्व भएपछि प्रहरी सहायक निरीक्षक कृष्ण पोखरेल नेतृत्वको टोलीले सम्बन्धित निकायसँग समन्वय गरी सडक खुलाउन पहल भइरहेको जिल्ला प्रहरी कार्यालय बागलुङका प्रहरी नायब उपरीक्षक वसन्त पाण्डेले बताउनुभयो ।
करिडोर र बागलुङ कुश्मीशेरा सडकको दव्ल्याङमा पाँच वर्षदेखि खसिरहेको पहिरोका कारण सामान्य वर्षा हुँदासमेत सडक अवरुद्ध हुने गरेको छ ।
