जनार्जन खत्री
सर्लाही, साउन २८ गते । सर्लाहीको चुरेवर्ती क्षेत्रका नागरिक सामाजिक सुरक्षा भत्ता नवीकरण गर्न छ घण्टाभन्दा बढी पैदल हिँडेर वडा कार्यालय धाउन बाध्य भएका छन् ।
निरन्तर वर्षा भएर खोलामा बाढी आउन थालेपछि जिल्लाको चुरे पहाडी बस्तीमा गाडी चल्न सकेका छैनन् । खोलाको बगर भएर हिँड्नुपर्ने लालबन्दी नगरपालिका – १३, १४ र १५ तथा ईश्वरपुर नगरपालिका – १२ को चुरेभेगमा यस प्रकारको समस्या छ ।
सिन्धुलीसँग सीमा जोडिएको चुरेवर्ती गाउँदेखि तल फेदीमा रहेका वडा कार्यालयसम्म आउँदा दुईदेखि तीन घण्टा र फर्कदा उत्तिनै समय पैदल हिँड्नुपर्ने अवस्था रहेको स्थानीयले गुनासो गरेका छन् । लालबन्दी नगरपालिका–१४, नारायणखोलास्थित पन्ध्रबिघाका लालबहादुर पाख्रिनले ज्येष्ठ नागरिक भत्ता लिने वृद्धवृद्धालाई कतै लठ्ठी टेकाउँदै त कतै बोकेर र पाँच वर्षमुनिका बालबालिकालाई छ घण्टासम्म काखी च्यापेर बोक्नुपर्ने अवस्था रहेको गुनासो गर्नुभयो ।
सडक सञ्जालमा नजोडिएको लालबन्दी १४ नारायणखोलाका स्थानीयलाई गाडी चल्ने ठाउँ पत्थरकोटसम्म आउँदा तीन घण्टासम्म पैदल हिँड्नुपर्ने बाध्यता छ । यो समयमा सामाजिक सुरक्षा भत्ता नवीकरणसँगै बिरामी पर्दा उपचारका लागि लालबन्दी बजारसम्म आउन सारै समस्या रहेको पाख्रिनले बताउनुभयो ।
“वर्षायामकै बेला भत्ता नवीकरण गर्नुपर्ने भएकाले वृद्धृवृद्धालाई असाध्य कष्ट छ,” पाख्रिनले भन्नुभयो, “वडा कार्यालय जाँदा–आउँदा खोलामा माथिबाट बाढी बढेर आए झन् समस्या हुन्छ ।” भौगोलिक विकटता रहेको लालबन्दी १४ नारायणखोलाको वडा कार्यालय लालबन्दी बजारबाट सञ्चालन हुँदै आएको छ ।
वडाध्यक्ष छेनामसिंह घिसिङले गाउँमा इन्टरनेटलगायत अन्य कुनै सुविधा नरहेकाले लालबन्दी बजारबाटै वडा कार्यालय सञ्चालन गरिरहेको र ठुलो भूभागमा फैलिएको नारायणखोलाका स्थानीयलाई यही वडा कार्यालय राख्दा इलाका प्रशासन कार्यालय हरिवनमा नागरिकता बनाउन जान तथा अन्य प्रयोजनका लागि पायक पर्ने अवस्था रहेको बताउनुभयो । वृद्धवृद्धालाई खोलामा बाढी घटेपछि सहजरुपमा आउन आग्रह गरे पनि अघिल्लो आर्थिक वर्षको भत्ता बुझ्ने र यो आर्थिक वर्षका लागि नवीकरण पनि गर्ने भनेर आइरहेका वडाध्यक्ष घिसिङको भनाइ छ ।
वडाध्यक्ष घिसिङले भन्नुभयो, “भदौभरि आएर नवीकरण गर्दा पनि हुने हो तर उहाँहरु नवीकरण पनि गराऊँ अनि भत्ता पनि लिएर जाऊँ भनेर आइरहनुभएको छ ।” सर्लाहीको चुरेवर्ती भेगमा लखन्देही, डाइनी, कालिन्जोर, फूलजोर र बाँके खोलाको बगर भएर बस, बोलेरो र मोटरसाइकल सञ्चालन हुने गरे पनि वर्षायाम सुरु भएसँगै ठप्प छन् ।
लालबन्दी नगरपालिका १५ का वडाध्यक्ष गोरखबहादुर बलले चुरेभेगमा मोटरसाइकलधरी सञ्चालन हुन नसक्दा भत्ता नवीकरण गर्न आउने ज्येष्ठ नागरिक, अपाङ्गता भएका व्यक्तिलाई समस्या परेको बताउनुभयो । “चुरेभेगका मानिसलाई वडा कार्यालयसम्म आउन समस्या नै छ तर भत्ता पनि नवीकरण त गर्नुपर्यो,” वडाध्यक्ष बलले भन्नुभयो, “उहाँहरुलाई यहाँ आउन समस्या छ, हामी पनि उता जान सक्ने अवस्था छैन ।”
चुरेको पाखाबाट घण्टौँ धाएर पैदल हिँड्दै आउने सेवाग्राही सामाजिक सुरक्षा भत्ता नवीकरण गर्ने प्रणाली (सिस्टम) बेलाबेलामा नचल्ने समस्याले थप हैरान हुने गरेका छन् । ईश्वरपुर नगरपालिका–१२, कालिन्जोरका वडासचिव पुष्पबहादुर खड्काले सामाजिक सुरक्षा भत्ता नवीकरणका बेला कहिलेकाही सर्भरले काम नगर्ने समस्या रहेको जानकारी दिनुभयो ।
सर्लाहीमा हरिवन नगरपालिका–१ र बागमती नगरपालिका– १ मा चुरेभेगका बस्ती रहे पनि लालबन्दी र ईश्वरपुर नगरपालिकाको तुलनामा विकट बस्ती कम छन् । बागमती नगरपालिका–१ का वडाध्यक्ष गम्भीरसिंह पाख्रिनले सिन्धुलीको हरिहरपुरगढीसँगको सीमाका बस्तीबाट एक÷डेढ घण्टा पैदल हिँडेर वडा कार्यालयसम्म आउन सकिने अवस्था रहेको बताउनुभयो ।
