सिन्धुली समाचारदाता
सिन्धुलीमाढी, साउन २८ गते । सिन्धुली जिल्लामा स्थानीय तहले धमाधम १५ शय्याको आधारभूत अस्पताल सञ्चालन गर्दै गएका छन् । स्थानीय तहले ‘एक स्थानीय तह, एक आधारभूत अस्पताल’ सरकारको नीति अनुसार स्थानीयस्तरमा नै नागरिकलाई आधारभूत स्वास्थ्य सेवा दिन पछिल्लो समयमा अस्पताल सञ्चालन गर्दै आएका हुन् ।
यसै व्रmममा गोलन्जोर गाउँपालिकाले वडा नं. ३ ग्वाल्टारमा १५ श-याको आधारभूत अस्पतालको भदौ अन्तिम साताबाट सञ्चालनको तयारी भइरहेको जनाएको छ । गाउँपालिकाका अनुसार ग्वाल्टारमा ब्याक टु लाइफ इभी जर्मनीको आर्थिक सहयोगमा १५ शय्याको अस्पताल भवन निर्माण सम्पन्न भएपछि उक्त अस्पताल सञ्चालनको तयारी गरिएको हो । उक्त अस्पताल सञ्चालनका लागि मदन भण्डारी स्वास्थ्य विज्ञान प्रतिष्ठान हेटौँडा र गोलन्जोर गाउँपालिकाबिच स्वास्थ्य सेवा र शिक्षामा सहकार्य गर्न साउन २२ गते सम्झौतासमेत भएको गाउँपालिका अध्यक्ष शङ्कर बरालले जानकारी दिनुभयो ।
उक्त सम्झौतापत्रमा प्रतिष्ठानका तर्फबाट उपकुलपति डा. प्रदीप ज्ञवाली र गाउँपालिकाका तर्फबाट अध्यक्ष बरालले हस्ताक्षर गर्नुभएको छ । स्वास्थ्य विज्ञान शिक्षालाई व्यावहारिक बनाउने र गाउँस्तरसम्म गुणस्तरीय स्वास्थ्य सेवा विस्तार गर्ने उद्देश्यले सम्झौता गरिएको गाउँपालिका अध्यक्ष बरालले जानकारी दिनुभयो ।
सम्झौता अनुसार अब मदन भण्डारी प्रतिष्ठानका स्नातक र स्नातकोत्तर तहका विद्यार्थीले गोलन्जोर आधारभूत अस्पतालमा प्रत्यक्ष अभ्यास गर्ने अवसर पाउने छन् । यसबाट एकातिर विद्यार्थीले ज्ञानलाई व्यवहारमा उतार्ने वातावरण बन्ने छ भने अर्कातिर गाउँपालिकाका सर्र्वसाधारणले विशेषज्ञ चिकित्सकको सेवा गाउँमै प्राप्त गर्न सक्ने पालिकाले जनाएको छ ।
प्रतिष्ठानले अस्पतालमा आवश्यक परेमा प्राविधिक कर्मचारी पठाउने, तालिम दिने, डिजिटल स्वास्थ्य सेवाको प्रयोगलाई प्रोत्साहन गर्ने र अनुसन्धानका आधारमा स्वास्थ्य नीति निर्माणमा सघाउने प्रतिबद्धता जनाएको छ । सहकार्य पाँच वर्षका लागि हुने छ र आवश्यकता अनुसार नवीकरण गर्न सकिने व्यवस्था गरिएको छ । गाउँपालिकाका अनुसार ब्याक टु लाइफ इभी जर्मनीको आर्थिक सहयोग तथा समुदाय पद्धति विकास सेवा (सिएसडिएस) सिन्धुलीको प्राविधिक सहयोगमा एआइडी कन्स्ट्रक्सनले १८ महिनामा छ करोड ७६ लाख २१ हजार १३५ रुपियाँको लागतमा निर्माण सम्पन्न गर्ने गरी २०८१ वैशाख १४ गते सम्झौता गरी ग्वाल्टार आधारभूत अस्पतालको भवन निर्माण सुरु गरेको थियो । अहिले भवन निर्माण सकिएको र अस्पतालका लागि हुनुपर्ने मापदण्ड अनुसारको भवन बनेको गाउँपालिकाले जनाएको छ ।
गाउँपालिका अध्यक्ष बरालले अस्पतालका लागि हाल कार्यालय सहयोगीबाहेक ३२ जना विभिन्न तहका कर्मचारीको दरबन्दी स्वीकृत गरेको र सुरुमा एक जना एमबिबिएस चिकित्सक र स्टाफ नर्सको व्यवस्था गरी चिकित्सक सेवा प्रारम्भ गरिने बताउनुभयो । उहाँले भन्नुभयो, “स्रोत र साधन जुट्दै गएपछि त्यही अनुसार जनशक्ति पनि थपिँदै जाने छन् । अस्पताल पूर्ण रूपमा सञ्चालन हुँदा नौ जना विशेषज्ञ चिकित्सक नै रहने व्यवस्था गरिएको छ ।” उक्त अस्पतालले गोलन्जोरसँगै फिक्कल, सुनकोशी, रामेछाप, ओखलढुङ्गा र खोटाङका सीमावर्ती क्षेत्रका नागरिकलाई लक्षित गरी सेवा प्रवाह गर्ने छ ।
नौ वटा स्थानीय तह रहेको सिन्धुली जिल्लामा हालसम्म कमलामाई नगरपालिकामा सय शय्याको अस्पताल सञ्चालनमा रहेको छ । त्यस्तै दुधौली नगरपालिका, तीन पाटन गाउँपालिका र फिक्कल गाउँपालिकाले पनि १५ शय्याको अस्पताल भवन निर्माण गरी सेवा सञ्चालनमा ल्याइसकेका छन् । बाँकी हरिहरपुरगढी, मरिण, सुनकोशी गाउँपालिकामा उक्त आधारभूत अस्पताल भवन धमाधम निर्माण भइरहेको छ । घ्याङलेख गाउँपालिका–३, सोलाभन्ज्याङमा डिपिआर भएको वर्ष दिन बितिसक्दा पनि अस्पताल भवन निर्माणको काम अगाडि बढ्न सकेको छैन ।
