बुलबुले समाचारदाता
सुर्खेत, साउन २८ गते । पछिल्लो केही वर्षयता सुर्खेतमा अटोरिक्साको प्रयोग बढेको छ । यसले यात्रुलाई सुविधा दिएको छ । छोटो दुरीको यात्राका लागि रिक्सा सहज माध्यम बनेको छ । धेरैलाई रोजगारीको अवसर पनि सिर्जना गरेको छ तर अटोरिक्साले सुविधासँगै जोखिम पनि बढाएको छ । अटोरिक्साको मनपरीले क्षति निम्त्याइरहे पनि नियमन गर्नुपर्ने निकायको ध्यान भने पुगेको छैन । अटोमा यात्रा गर्दा जोखिम पनि उस्तै छ । अधिकांश चालकसँग सवारी लाइसेन्स छैन । लाइसेन्सबिनाका चालकले तीव्र गतिमा हाँक्दा दुर्घटनासमेत हुने गरेको छ ।
पश्चिम सुर्खेतको चौकुने गाउँपालिकामा आइतबार बिहान अटोरिक्सा दुर्घटना भयो । दुर्घटनामा सात जना घाइते भएका छन् । घाइतेमध्ये पाँचमहिने शिशुको अवस्था गम्भीर रहेको जिल्ला प्रहरी कार्यालय सुर्खेतले जनाएको छ । दुर्घटनामा अटो चालकसहित सवार सबै जना घाइते भएका छन् । जिल्ला प्रहरी कार्यालय सुर्खेतका प्रहरी नायब उपरीक्षक (डिएसपी) मोहनजङ्ग बुढ्थापाका अनुसार शिशुको अवस्था चिन्ताजनक छ ।
अटोरिक्सा अव्यवस्थित रूपमा सञ्चालन भइरहेको गुनासो बढेपछि नगरपालिकाले विसं २०७५ सालमै निर्देशिका बनाई सोही अनुसार सञ्चालन गर्न भनेको थियो । उक्त निर्देशिकामा उपत्यकाका सबै क्षेत्रमा रुट र भाडादरसमेत तोकिएको छ । निर्देशिका अनुसार वीरेन्द्रनगर उपत्यकाका जुनसुकै ठाउँमा पुग्न पनि ६० रुपियाँभन्दा बढी भाडा लिन नपाइने भनिएको छ । भाडादरमा एकरूपता छैन । एउटै दुरीमा पनि चालक अनुसार फरक फरक भाडा लिने गरिएको छ । छोटो वा लामो दुरीको भाडामा एकरूपता नहुँदा सेवाग्राही ठगिएका छन् ।
भाडा दर कायम, पार्किङ र रुट व्यवस्थापन नहुँदा अटोरिक्सा जथाभाबी रूपमा चलिरहेका छन् । जथाभाबी रूपमा चल्ने इरिक्साका कारण ट्राफिक व्यवस्थापनमा चुनौती बढेको छ । स्थानीय निकाय रिक्सा नियमन र व्यवस्थापनमा जिम्मेवार भएर लाग्नु पर्ने आवश्यकता देखिएको छ । वीरेन्द्रनगर नगरपालिकाले स्थानीय प्रशासन र ट्राफिक प्रहरीसँगको समन्वयमा रिक्साको मनपरी नियन्त्रण गर्न सक्दछ । सुरुवातदेखि नै व्यवस्थित गरिनुपर्ने रिक्सालाई यत्तिकै छोड्दा समस्या बढेको हो ।
