मुगु समाचारदाता
मुगु, साउन २८ गते । मुगुमा कुल जनसङ्ख्याको १९ प्रतिशत मानिस मात्र स्वास्थ्य बिमामा आबद्ध भएका छन् । २०७८ सालको जनगणना अनुसार मुगुको कुल जनसङ्ख्या ६६ हजार ६५८ रहेको छ ।
स्वास्थ्य बिमा बोर्ड जिल्ला सम्पर्क शाखा कार्यालय गमगढी मुगुको तथ्याङ्कको आधारमा मुगुमा अझै ८१ प्रतिशत जनसङ्ख्या स्वास्थ्य बिमा पहुँचबाहिर रहेको पाइएको छ । स्वास्थ्य बिमा बोर्ड जिल्ला सम्पर्क शाखा कार्यालयका जिल्ला संयोजक तेजबहादुर बमका अनुसार स्वास्थ्य बिमा बोर्डको निर्देशिका अनुसार स्वास्थ्य बिमा कार्यक्रममा सहभागी हुन पाँच जनासम्मको परिवारले वार्षिक रूपमा तीन हजार पाँच सय रुपियाँ तिर्नुपर्ने हुन्छ । परिवारमा पाँच जनाभन्दा बढी सदस्य भएमा प्रतिसदस्यको सात सय रुपियाँका दरले थप रकम तिर्नुपर्ने प्रावधान छ । स्वास्थ्य बिमा नियमावली, २०७५ ले ७० वर्ष उमेर पूरा भएका ज्येष्ठ नागरिकलाई नेपाल सरकारले नै प्रिमियम रकम तिरेर निःशुल्क स्वास्थ्य बिमा गरेको छ । सरकारले बिमामा आबद्ध पाँच जना सदस्यलाई वार्षिक एक लाख रुपियाँ बराबरको स्वास्थ्य सेवा उपलब्ध गराउने गरेको छ । त्यसै गरी पाँच जनाभन्दा माथिको परिवार सदस्यलाई दुई लाख रुपियाँ बराबरको स्वास्थ्य सेवा उपलब्ध गराउने गरेको उहाँले बताउनुभयो ।
जनचेतना र गरिबीका कारण अझै पनि केही नागरिक स्वास्थ्य बिमामा आबद्ध हुन नसकेका हुन् । यसको महत्त्व धेरै भए पनि जानकारी नभएको तथा आर्थिक अभावका कारण गर्न नसकेको हुन सक्ने नागरिक समाजका अध्यक्ष रूपबहादुर मल्लले बताउनुभयो । नेपालको संविधानमै आधारभूत स्वास्थ्य सेवालाई नेपाली नागरिकको मौलिक हकका रूपमा स्थापित गरिएको भए पनि दुर्गमका नागरिक यो सुविधाबाट वञ्चित रहेको अग्रज पत्रकार विनोदकुमार मल्लले बताउनुभयो । आर्थिक वर्ष २०७२/७३ देखि यो कार्यक्रम लागु भएको हो । मुगुमा भने २०७७ सालदेखि स्वास्थ्य बिमा कार्यक्रम सञ्चालनमा रहेको स्वास्थ्य बिमा बोर्ड मुगुले बताएको छ ।
मुगुमा स्वास्थ्य बिमामा आबद्ध भएकालाई विभिन्न प्राथमिक स्वास्थ्य केन्द्र र जिल्ला अस्पतालबाट स्वास्थ्य बिमाको सुविधा पाउने व्यवस्था गरिएको छ । मुगु अस्पतालमा दैनिक ५० देखि एक सय जनासम्म बिमित उपचार गराउन आउने गरेको जिल्ला अस्पताल मुगुले जनाएको छ । जिल्ला अस्पताल मुगुमा उपचार गर्न आउँदा बिमितले सो अनुसारको औषधी नपाउने गरेको छायानाथ रारा नगरपालिका–६ का अमरबहादुर कार्कीले गुनासो गर्नुभयो ।
यता जिल्ला अस्पताल मुगुका कार्यालय प्रमुख डा. निर्मल नगरकोटीका अनुसार जिल्लामा स्थापना भएको स्वास्थ्य बिमा बोर्ड जिल्ला सम्पर्क शाखा कार्यालयले जिल्लामा स्वास्थ्य बिमासम्बन्धी प्रभावकारी प्रचारप्रसार नगर्दा जिल्लामा १९ प्रतिशतले मात्रै बिमा गरेका छन् । उहाँले थोरै बिमित भएका जिल्लामा बोर्डले औषधी खर्चबापत रकम उपलब्ध नगराउँदा सबै प्रकारका औषधी खरिद नगरेको उहाँले बताउनुभयो । सरकारले निःशुल्क उपलब्ध गराएका ९८ प्रकारका औषधी बिमितलाई उपलब्ध गराउँदै आएको उहाँले जनाउनुभयो ।
