दैलेख समाचारदाता
दैलेख, साउन २८ गते । तत्कालीन द्वन्द्वकालमा जिउँदै गाडेर हत्या गरिएका पत्रकार डेकेन्द्रराज थापाको योगदानलाई बिर्सन नहुने सुझाव दिइएको छ । पत्रकार डेकेन्द्र थापाको २१ औँ स्मृति दिवसका अवसमा नेपाल पत्रकार महासङ्घ दैलेख शाखाद्वारा आयोजित ‘सम्झनामा डेकेन्द्र’ विषयक कार्यक्रममा पत्रकारितासँगै सामाजिक विषयमा वकालत गर्दा मृत्युवरण गर्ने व्यक्तिलाई बिर्सन नहुने सुझाव दिएका हुन् ।
प्रमुख जिल्ला अधिकारी बद्रीनाथ गैरेले जिल्लाको विकास, सुशासन र सामाजिक न्यायका निम्ति स्व. पत्रकार डेकेन्द्र थापाको योगदानको स्मरण गर्नुभयो । उहाँले नारायण नगरपालिकाका जनताका लागि खानेपानी खुवाउने क्रममा ज्यान गुमाउनु परेको स्मरण गर्दै सामाजिक क्षेत्रमा पुर्याएको योगदानलाई सबैले सम्झनुपर्ने बताउनुभयो ।
नारायण नगर खानेपानी उपभोक्ता समितिका संयोजक तथा नारायण नगरपालिका–१ का वडाध्यक्ष सन्देशकुमार श्रेष्ठले स्व. पत्रकार डेकेन्द्रराज थापाले समाजमा उत्पीडन परेका वर्गको आवाजलाई उठाउन महत्त्वपूर्ण योगदान गरेको बताउनुभयो । नेपाल पत्रकार महासङ्घका पूर्वअध्यक्ष पुष्कर थापाले स्व. पत्रकार डेकेन्द्रराज थापालाई निडर, निःस्वार्थ ढङ्गले समाजका लागि आफ्नो ज्यान गुमाएको बताउँदै उहाँको योगदानलाई कहिल्यै नबिर्सने बताउनुभयो ।
नेपाल पत्रकार महासङ्घका निवर्तमान अध्यक्ष एवं स्व. पत्रकार डेकेन्द्रराज थापाका भाइ यज्ञराज थापाले स्व. पत्रकार डेकेन्द्रराज थापाको योगदानलाई नागरिक समाज, राजनीतिक पार्टीले बिर्सिएकोमा चिन्ता व्यक्त गर्नुभयो । उहाँले जुन खानेपानी ल्याउन मृत्युवरण गर्नुभयो त्यसको नाम डेकेन्द्र नगर खानेपानी राख्न नमानेको, हत्या गरिएको स्थल नौमुले गाउँपालिका–३, द्वारीको विद्यालयको नाम डेकेन्द्र माध्यमिक विद्यालय राख्न खोजे पनि कुनै निकायले त्यसका लागि समन्वय र सहकार्य नगरेको उल्लेख गर्नुभयो । सामाजिक अभियन्ता राधा मल्लले स्व. थापा समाज रूपान्तरणमा लागेको स्मरण गर्नुभयो । सशस्त्र द्वन्द्वको समयमा तत्कालीन युद्धरत पक्ष नेकपा माओवादीले आफ्नो नियन्त्रणमा राखेको ४५ दिनमा २०६१ साउन २७ गते अहिलेको नौमुले गाउँपालिका–३, द्वारीमा हत्या गरेको थियो ।
