सामुदायिक वनलाई करको दायरामा ल्याउँदै वालिङ नगरपालिका

राधाकृष्ण डुम्रे 
वालिङ (स्याङ्जा),साउन २० गते । स्याङ्जाको वालिङ नगरपालिकाले सामुदायिक वनलाई व्यवस्थित गर्न सुरु गरेको छ । सामुदायिक वनलाई करको दायरामा ल्याउने योजनासहित पालिकाले सामुदायिक वन लक्षित कार्य सुरु गरेको हो ।

पालिका भित्र रहेका ८७ वटा सामुदायिक वनलाई व्यवस्थित गर्ने र आर्थिक उपार्जनको स्रोत बनाउने योजना बनाएको नगरउपप्रमुख कविता तिवारीले जानकारी दिनुभयो । उहाँले भन्नुभयो, “हरित उत्पादन र वातावारण संरक्षणमा वन उपभोक्ता समूहहरुको महत्त्वपूर्ण भूमिका रहँदै आएको छ ।”

पालिकाले गरेको आह्वान अनुसार २५ वटा सामुदायिक वनले लेखापरीक्षण गराएको उहाँको भनाइ छ । तोकिएको समयमा कार्ययोजना सहित कागजात पालिकालाई पेश गर्ने १४ वटा वन उपभोक्ता समूहलाई प्रोत्साहन स्वरुप नगद प्रदान गरिएको उपप्रमुख तिवारीले बताउनुभयो । लेखापरीक्षण र बनका क्रियाकलापलाई पारदर्शि बनाउन प्रति समूह रु तीन हजार प्रदान गरिएको पालिकाले जनाएको छ ।

सामुदायिक वन उपभोक्ता महासंघ नेपालका केन्द्रीय सदस्य केदार काफ्लेले नेपालका सामुदायिक वनलाई व्यवस्थित गर्न आवश्यक रहेको बताउनु भयो । उहाँले भन्नुभयो, “प्रशस्त स्रोत भएर पनि सामुदायिक वनको सही प्रयोग हुन सकेको छैन, यस तर्फ सबैले ध्यान दिन जरुरी छ ।”

सामुदायिक वन उपभोक्ताहरुको नगरस्तरीय समितिले वन समितिहरुलाई व्यवस्थित गर्दै आएको जनाएको छ । अध्यक्ष कमल गैह्रेका अनुसार सामुदायिक बन उपभोक्ता समितिहरुले वन व्यवस्थापनमा काम गर्दै आइरहेको छ ।

विगतमा निस्क्रिय रहेका सामुदायिक वनहरुको नविकरणको काम भइरहेको सामुदायिक वन उपभोक्ता महासंघ गण्डकी प्रदेश न्यायिक समितिका संयोजक सीता काफ्लेले जानकारी दिनुभयो । उहाँले भन्नुभयो, “कार्वन उत्सर्जनमा स्थानीय सामुदायिक वनको महत्त्वपूर्ण भूमिका छ ।” यस वापत विदेशबाट आउने रकम सामुदायिक बन उपभोक्ता समूह सम्म आई पुग्नु पर्ने उहाँको भनाइ छ ।