कान्द्रा नदी किनारमा बृद्ध मृत फेला

चाँदनी आचार्य

घोडाघोडी (कैलाली), असार २५ गते । कैलालीमा कान्द्रा नदीले बगाउँदा बुधबार एक बृद्धाको मृत्यु भएको छ । घोडाघोडी नगरपालिका वडा ४ माघी गाउँका ७० बर्षीय चुनबुधिया चौधरीको नदीले बगाएको अबस्थामा शव फेला परेको हो । 

बोल्न र राम्रोसँग कान नसु्न्ने बृद्धा बुधबार बिहान दाउरा खोज्न गएको अवस्थामा कान्द्रा नदीले बगाएको हुनसक्ने पारिवारिक स्रोतलाई उल्लेख गर्दै प्रहरीले जनाएको छ ।

ईलाका प्रहरी कार्यालय सुख्खडका प्रमुख प्रहरी नायव उपरीक्षक रमेशदत्त अवस्थीले घोडाघोडी नगरपालिका –१० कान्द्रा नदी पुलभन्दा उत्तरतर्फ तट्बन्धननजिक खोला किनारमा शव देखेपछि स्थानीयले प्रहरीलाई खबर गरेको उल्लेख गर्नुभयो ।

बृद्ध महिलाको खोलाले बगाएको अवस्थामा लाश भेटिएको जानकारी मृतक परिवारसम्म पुगेपछि सनाखत भएको हो । अहिले मृतकका छोरा रामकृष्ण चौधरी ईलाका प्रहरी कार्यालय सुख्खड पुग्नुभएको छ । पोष्टमार्टमका लागि बर्दगोरिया अस्पतालमा पठाउने तयारी भएको ईलाका प्रहरी कार्यालय प्रमुख अवस्थीले बताउनुभयो ।