काठमाडौँ, असार २३ गते । हिमालयन शेर्पा क्लब र फ्रेन्ड्स क्लबले एन्फा यु–१६ युथ लिगमा जित निकालेका छन् ।
एन्फा मैदान सातदोवाटोमा सोमबार भएको खेलमा हिमालयन शेर्पाले श्री भगवती क्लबलाई ३–१ गोलले हरायो ।
शेर्पालाई जित दिलाउन कप्तान प्रदीप खत्री, विष्णु सुनुवार र जेनिल सुब्बाले गोल गर्नुभयो । श्री भगवतीका अनिल गुरुङले सान्त्वना गोल फर्काउनुभयो ।
यस्तै अर्को खेलमा मन्दीप ढुंगेलको पाँच् गोल सहयोगमा फ्रेन्ड्स क्लबले साविक विजेता चर्च ब्वाइज युनाइटेडलाई ७–० गोलले हरायो ।
एक पक्षीय खेलमा फ्रेन्ड्सका लागि बाँकी दुई गोल सुनिल केसी र ऋषभ पुनले गर्नुभयो । लिगमा ‘ए’ डिभिजनका १४ क्लबको सहभागिता रहेको छ ।
लिगको विजेता टोलीले एक लाख रुपियाँ र उपविजेता ५० हजार रुपियाँ पुरस्कार पाउने छ । यस्तै व्यक्तिगत विधाका उत्कृष्ट खेलाडी र अनुशासित टोलीलाई १५/१५ हजार रुपियाँ प्रदान गरिने एन्फाले जनाएको छ ।
