कन्हैयालाल केशरी
पर्सा, असार १३ गते । आस्थाको केन्द्रबिन्दु तथा शक्तिपीठको रूपमा रहेको वीरगन्जमा प्रख्यात गहवामाईको रथयात्रा भव्य रुपमा शुक्रबार सम्पन्न भएको छ ।
गहवामाइ तीर्थस्थल क्षेत्र विकास समितिको आयोजनामा तेस्रो रथयात्रा वीरगन्ज महानगरपालिकाका प्रमुख राजेशमान सिंहलगायतका सहभागितामा वीरगन्जका विभिन्न ठाउँ तथा धार्मिक स्थलहरुको परिक्रमा गरी माइस्थान मन्दिर गहवामाईको परिसरमा आई सम्पन्न भएको हो ।
आयोजक समितिका अध्यक्ष एवम् गहवामाई तीर्थस्थल क्षेत्र विकास समितिका अध्यक्ष श्याम पोखरेलका अनुसार प्रत्येक वर्ष गहवामाईप्रतिको आस्था र विश्वास बढ्दै गएको र अन्य वर्षको तुलनामा यस वर्ष भक्तजनको उत्साहजनक सहभागिता रहेको बताउनुभयो ।
अध्यक्ष पोखरेल प्रत्येक वर्ष झैँ यस वर्ष पनि गहवामाई तीर्थस्थल क्षेत्र विकास समितिले शनिबार महाप्रसादको आयोजना गर्ने र महाभोजमा लगभग ५० हजार भक्तजन सहभागी हुने अनुमान गरी सोही अनुरूपको तयारी भइरहेको जानकारी दिनुभयो ।
