यु–१४ विद्यालय खेलकुद : सय मिटरमा अदित्य र गौरीलाई स्वर्ण

काठमाडौँ, जेठ २५ गते । मधेश प्रदेशका अदित्य यादव र सुदूरपश्चिम प्रदेशकी गौरीकुमारी साउदले यु–१४ राष्ट्रिय विद्यालय खेलकुदअन्तर्गत एथलेटिक्सको एक सय मिटर दौडमा आइतबार स्वर्ण जित्नुभएको छ ।

आदित्य छात्र तथा गौरी छात्रामा पहिलाे हुनुभएको हो । त्रिपुरेश्वरस्थित दशरथ रङ्गशालामा अदित्यले निर्धारित दूरी ११.६ सेकेन्डमा पूरा गर्नुभयो । कर्णाली प्रदेशका सुरेन्द्र परियारले रजत तथा कोशी प्रदेशका अंकित ताजपुरीयाले कांस्य जित्नुभयो । 

राष्ट्रिय खेलकुद परिषद्को आयोजनामा भइरहेको प्रतियोगितामा गौरीले निर्धारित दूरी तय गर्न १४.६ सेकेन्ड समय खर्चिनुभयो । कर्णालीकी गोमा शाहीले रजत तथा कोशीकी प्रकृति काफलेले कांस्य हात पार्नुभयो । 

छात्र चार सय मिटर दौडमा गण्डकी प्रदेशका आयन राना पहिलो हुनुभयो । उहाँले उनले ५५.६ सेकेन्डमा दौड सकाउनुभयो । सुदूरपश्चिमका रोहित धामी दोस्रो तथा कोशीका प्रियान्शु शाह तेस्रो हुनुभयो ।

सोही स्पर्धाको छात्रामा कर्णालीकी सुष्मा बुढा ६९.३ सेकेन्ड समयसाथ शीर्ष स्थानमा रहनुभयो ।  गण्डकीकी आराध्या चालिसे दोस्रो तथा बागमती प्रदेशीकी शिल्भी नागा तेस्रो बन्नुभयो । 

छात्र लङजम्पमा कर्णालीका सुरेन्द्र सुनार पहिलो हुनुभयो । उहाँले ५.९८ मिटर जम्प गर्नुभयो । कोशीका नितेश गच्छदार दोस्रो तथा सुदूरपश्चिमका मोहन परियार तेस्रो हुनुभयो ।

उक्त स्पर्धाको छात्रामा ४.१७ मिटर जम्प गरेकी लुम्बिनीकी अनुजा थारू चौधरी पहिलो, कर्णालीकी करुणा चन्द दोस्रो र कोशीकी प्रकृति काफ्ले तेस्रो हुनुभयो ।

जम्मा १२ स्पर्धा समावेश एथलेटिक्सको पहिलो दिन ६ स्वर्णका लागि प्रतिस्पर्धा भएकोमा कर्णालीले दुई स्वर्ण जितेको छ । सुदूरपश्चिम, गण्डकी, मधेश र लुम्बिनीले एक एक १–१ स्वर्ण जितेका छन् ।