रमेश विश्वकर्मा
गुल्मी, वैशाख २८ गते। प्रमुख प्रतिपक्ष दल नेकपा (माओवादी केन्द्र) केन्द्रका सचिव एवम् लुम्बिनी प्रदेश इन्चार्ज चक्रपाणि खनाल ‘वलदेव’ ले जनतामा माओवादी केन्द्र प्रतिको आकषर्ण बढ्दै गएको बताउनुभएको छ। गुल्मीको रुरुक्षेत्र गाउँपालिकामा माओवादी केन्द्रको तेस्रो अधिवेशनलाई सम्बोधन गर्नुहुँदै उहाँले यस्तो बताउनुभएको हो।
नेता खनालले पार्टी अध्यक्ष पुष्पकमल दाहाल ‘प्रचण्ड’ले पछिल्लो पटक सरकारको नेतृत्वमा रहँदा भ्रष्टचार विरुद्धमा चालेको कदम र सुशासनका पक्षमा खेलेको भूमिकाले जनतामा माओवादी प्रति आकषर्ण बढेको बताउनुभयो। कुनै पनि दलले नेपाली जनतालाई आफ्नो ठेक्का वा पेवा रूपमा ठान्न नहुने उहाँको भनाइ छ।
देशका समकालीन शीर्ष नेतामध्ये पार्टी अध्यक्ष प्रचण्ड सबैभन्दा अब्बल र जनताले आश गर्ने एक मात्र नेता भएको दाबी गर्दै उहाँले नेकपा (माओवादी केन्द्र) केन्द्रले मात्रै देश र आम नेपाली जनताका हितमा काम गर्ने बताउनुभयो।
अधिवेशनबाट हरि ज्ञवालीको अध्यक्षतामा ४५ सदस्यीय नेकपा (माओवादी केन्द्र) रुरुक्षेत्र गाउँपालिका कमिटी गठन गरिएको छ। कमिटीको उपाध्यक्षमा कमलप्रसाद श्रेष्ठ, अशोक श्रेष्ठ, दामेन्द्र पाण्डे रहनुभएको छ। सचिवमा मेघराज गिरी, सह–सचिवमा सपना कुँवर, चेतबहादुर क्षेत्री, यज्ञ ज्ञवाली, कोषाध्यक्षमा गीता बम्रेल लगायत अन्य सदस्य रहनुभएको बताइएको छ।
