प्रतीक इच्छुक शर्मा
सल्यान, वैशाख ९ गते । सल्यानमा करेन्ट लागेर एक जनाको मृत्यु भएको छ । सोमबार राति शारदा नदीमा करेन्ट लगाई माछा मार्न गएका एक पुरुषको मृत्यु भएको हो । माछा मार्ने क्रममा ढुङ्गाबाट चिप्लिएर लडेका छत्रेश्वरी गाउँपालिका–७ का सन्तोष बिष्टको मृत्यु भएको जिल्ला प्रहरी कार्यालय सल्यानले जनाएको छ ।
माछा मार्ने क्रममा ढुङ्गाबाट चिप्लिएर पानीमा डुबेका बिष्टको तत्काल उद्धार गरी जिल्ला अस्पताल सल्यान ल्याउँदै गर्दा बाटोमै मृत्यु भएको जिल्ला प्रहरी कार्यालय सल्यानका प्रहरी प्रमुख डिएसपी केशर कुमार न्यौपानेले जानकारी दिनुभयो । उहाँका अनुसार मृतकको शव पोष्टमार्टमका लागि जिल्ला अस्पताल सल्यानमा राखिएको छ ।
गएराति सन्तोषसहित पाँच जना शङ्खमुलस्थित शङ्खपार्क नजिकैको शारदा नदीमा माछा मार्न गएका थिए । बिष्टको मृत्युपछि उहाका साथमा रहेका चार जनालाई इलाका प्रहरी कार्यालय लुहामले नियन्त्रणमा लिएर सोधपुछ गरिरहेको छ । घटनाको अनुसन्धान पनि भइरहेको प्रहरीले जनाएको छ ।
