खो खो लिगको तयारी पूरा, भोलीदेखि सुरु हुने

यज्ञप्रसाद सापकोटा
गुलरिया(बर्दिया), चैत २३ गते । नेपाल मै पहिलो पटक हुन लागेको खो खो लिग प्रतियोगिताको तयारी पूरा भएको छ । आइतबारदेखि बर्दियाको ठाकुरबाबा नगरपालिकामा सुरु हुने खो खो लिग प्रतियोगितामा पाँच ओटा टिमले प्रतिस्पर्धा गर्ने भएका छन् ।

नेपाल खो खो सङ्घले देश मै पहिलो पटक सुरु गरेको नेपाल खो–खो लिग २०८१ (ड्रिम खो–खो) खेलका लागि पाँच वटा टिम दर्ता भएको नेपाल खो खो सङ्घका वरिष्ठ उपाध्यक्ष छत्रबहादुर शाहीले बताउनुभयो । उहाँका अनुसार डली कन्स्ट्रक्सन राइनोज, न्याचर नेस्ट टाइगर्स, विकास प्रेमी ब्ल्याकबक, सुदूरपश्चिम किंग्स र कञ्चन गडाहवा रोयल्स टिमले प्रतिस्पर्धा गर्नेछन् । टिममा अन्तर्राष्ट्रिय एक राष्ट्रिय दुई, प्रदेश स्तरीय तीन र जिल्लास्तरका ६ जना गरी १२ जना खेलाडी रहने छन् । प्रतियोगिताको चैत २४ देखि २८ गतेसम्म सञ्चालन हुने छ ।

खो खो खेल हेर्न पूरै खेल अवधीसम्मका लागि टिकट दर एक हजार, एक दिन मात्रका लागि दुई सय रुपियाँ तोकिएको छ । त्यसैगरी विद्यार्थीका लागि पूरै खेल अवधीको पाँच सय र एक दिनका लागि एक सय ५० रुपियाँ तोकिएको छ । 

ठाकुरबाबा नगरपालिका खो खो खेलका लागि उर्वर भूमि मानिन्छ । गत पुसको अन्तिम सातामा भारतको दिल्लीमा भएको विश्वकप खो खो प्रतियोगितामा बर्दिया जिल्लाका मात्र १२ जना खेलाडी सहभागी भएका थिए । विश्वकप खो खो प्रतियोगितामा नेपाल उपविजेता बनेको थियो । २०७० सालदेखि ठाकुरबाबा नगरपालिकामा खो खो खेलको प्रवर्धन गर्न सुरु गरिएको थियो ।