‘शिक्षकका मागलाई यथोचित सम्बोधन गरौं’

रमेश विश्वकर्मा
गुल्मी, चैत २३ गते । गुल्मीको रेसुङ्गा नगरपालिकाका नगर प्रमुख खिलध्वज पन्थीले सङ्घीय सरकारले शिक्षकका मागलाई यथोचित सम्बोधन गर्नुपर्ने बताउनुभएको छ । विद्यालय शिक्षासम्बन्धी कानुनलाई संशोधन र एकीकरण गर्न बनेको विद्यालय शिक्षा विधेयक, २०८० संसदमा विचाराधीन रहेको भन्दै उहाँले शिक्षकका मागलाई यथोचित सम्बोधन सङ्घीय सरकारलाई आग्रह गर्नुभएको हो ।

उहाँले ऐन जारी गर्न ढिलाई गर्नुका साथै प्रस्तावित विधेयकमा शिक्षण क्षेत्रमा रहेका विद्यमान समस्या समाधानको स्पष्ट व्यवस्था नगरिएको बताउनुभयो । शिक्षक तथा विद्यालयका कर्मचारीहरूको वृत्ति विकासलाई बेवास्ता गर्न नहुने भन्दै नगर प्रमुख पन्थीले शिक्षकहरूको ट्रेड युनियन अधिकार कटौती गर्न खोजिएको बताउनुभयो ।

शिक्षकका मागलाई सम्बोधन गरी यथाशीघ्र ऐन जारी गर्न दबाब दिनका लागि शिक्षक महासङ्घको अगुवाइमा चैत २० गतेदेखि काठमाडौँ केन्द्रित आन्दोलन भएको छ । आन्दोलनका कारण रेसुङ्गा नगरपालिकासँगै देशभरका विद्यालयहरूमा शैक्षिक सत्र, २०८२ का भर्ना अभियानलगायतका शैक्षिक गतिविधि एवम् पठनपाठनका कार्यहरू प्रभावित भएको उहाँले बताउनुभयो ।

“नेपालको संविधानले शिक्षासम्बन्धी अधिकारलाई मौलिक हकको रूपमा प्रत्याभूत गरेको छ ।’’ उहाँले भन्नुभयो, “शिक्षा नागरिकको आर्थिक, सामाजिक, मानवीयलगायत सर्वाङ्गीण विकासका आधारसमेत हो ।’’ शिक्षा क्षेत्रको समुचित व्यवस्थापन नभई समृद्धि, सुशासन र समुन्नत राज्य निर्माणको उद्देश्य हासिल गर्न कठिन हुने उहाँको भनाइ छ ।

शिक्षण पेसामा संलग्न जनशक्तिको मनोबल उच्च गराउँदै शिक्षण पेसा र शैक्षिक क्षेत्रलाई मर्यादित एवम् प्रतिष्ठित बनाउन आवश्यक ठानी शिक्षकहरूले उठाउँदै आएका वृत्ति विकासलगायतका मागहरू यथोचित सम्बोधन गरी आन्दोलनका कार्यक्रम फिर्तासँगै शैक्षिक गतिविधि सुचारू हुने वातावरण निर्माण गर्न सम्बन्धित निकायलाई आग्रह गर्नुभयो ।