एकसाथ तीन पोस्टर सार्वजनिक

गोरखापत्र समाचारदाता

काठमाडौँ, चैत २३ गते  । दीपेन्द्र के खनाल निर्देशित ‘के घर के डेरा ः घर नं. २’ ले  एकसाथ तीन पोस्टर सार्वजनिक गरेको छ । तीन पोस्टर सार्वजनिक गर्दै चलचित्रले प्रदर्शन मितिसमेत परिवर्तन गरिएको निर्देशक खनालले जानकारी दिनुभयो । उहाँका अनुसार यसअघि जेठ ९ गते प्रदर्शन हुने भनिएको चलचित्र अब एक सातापहिले अर्थात् जेठ २ मा प्रदर्शन हुनेभएको छ । 

सार्वजनिक गरिएका तीन पोस्टरमध्ये एकमा निश्चल बस्नेतलाई सोलो रूपमा प्रस्तुत गरिएको छ । दोस्रो पोस्टरमा अर्का अभिनेता खगेन्द्र लामिछाने तथा अभिनेतृ उपासना सिंह ठकुरीलाई रोमान्टिक शैलीमा प्रस्तुत गरिएको छ । तेस्रो पोस्टरमा सिनेमाका अधिकांश मुख्य पात्रलाई प्रस्तुत गरिएको छ । 

चलचित्रलाई लेखक बुद्धि सागरले लेख्नुभएको हो । नकिमउद्दिन, शरद श्रेष्ठ तथा किरण महर्जन निर्माता रहनुभएका चलचित्रमा युवराज कार्की कार्यकारी निर्माताका रूपमा रहनुभएको छ । चलचित्रमा आर्यन सिग्देल, खगेन्द्र लामिछाने, निश्चल बस्नेत, केकी अधिकारी, उपासना सिंह ठकुरी, प्रकाश घिमिरे, सिर्जना नापित, सन्जोग रसाइली, रुविना घिमिरेलगायतका कलाकारको अभिनय रहेको छ ।