नौरते नेपाली
सिंजा (जुम्ला), चैत २२ गते । सिंजा क्षेत्रको तिनवटा स्थानीय तहलाई लक्षित गरि मालपोत र नापी कार्यालय नरोकोटमा स्थापना गरिएको छ । कनकासुन्दरी, हिमा र सिंजा गाउँपालिकाका नागरिकलाई मालपोत र नापीको सेवा दिने गरि कार्यालय स्थापना गरिएको हो ।
भूमि व्यवस्था, सहकारी तथा गरिबी निवारण मन्त्री बलराम अधिकारीले शुक्रबार एक समारोहकाबिच कार्यालय उद्घाटन गर्नुभएको हो । सिंजाको सहजतालाई छिटोछरितो सेवा प्रवाह गर्नको लागि कार्यालय स्थापना गरिएको उहाँले बताउनुभयो ।
जग्गाको कारोबारको लागि नागरिकले दुख पाउनु पर्ने अवस्था अन्त्य हुने आशा गरेको उहाँले बताउनु भयो । मन्त्री अधिकारीले कोहि पनि नागरिक भूमिहिन हुनु पर्ने अवस्था सरकारले अन्त्य गर्न खोजेको बताउनुभयो । जुम्लाको सदरमुकामदेखि टाढा रहेको सिंजा क्षेत्रका नागरिकलाई जग्गाको कारोबार गर्न समस्या भएकाले मालपोत र नापी कार्यालय सञ्चालन गरिएको हो ।
सिंजामा इलाका प्रशासन कार्यालय रहेकाले सिंजा गाउँपालिकाको नराकोटमा नै मालपोत र नापी कार्यालय स्थापना गर्न उपयुक्त भएको मालपोत र नापी कार्यालय स्थापना भएको गाउँपालिका अध्यक्ष पुर्ण प्रसाद धितालले बताउनुभयो । विगतमा सिंजा क्षेत्रका बासिन्दाले मालपोत र नापीसम्बन्धी कामका लागि सदरमुकाम खलंगासम्म पुग्नुपर्ने बाध्यता थियो। कार्यालय स्थापना सँगै उक्त समस्या हल हुने भएको छ ।
कार्यालय स्थापनासँगै प्रशासनिक सेवा सहज र छिटो हुने अपेक्षा गरिएको छ। यसअघि खलंगामा भिडभाड हुने समस्या समाधान हुने मात्र होइन, सेवाग्राहीले समय र खर्च दुबै जोगाउन सकिने अध्यक्ष धितालले बताउनुभयो । कार्यालय स्थापनाले सिंजालि जनताको जीवनस्तर उकास्ने र विकासले गतिले अपेक्षा गरिएको उहाँको भनाइ छ । स्थानीय नरमजंग रोकायाले जग्गा सम्बन्धि काम गर्नको लागि जुम्ला सदरमुकाम धाउनु पर्ने बाध्यता हटेको बताउनुभयो । कार्यालय स्थापनाले समय बचत र आर्थिक भार कम हुने जानकारी गराउनुभयो ।
