सप्तरीमा यस वर्ष चैते धान उत्पानमा वृद्धि हुने

विनय कर्ण

कल्याणपुर(सप्तरी), चैत २२ गते । सप्तरीमा यस वर्ष चैते धानको उत्पादनमा वृद्धि हुने भएको छ । गत वर्षभन्दा ३५० हेक्टर क्षेत्रफल बढी जग्गामा चैते धान रोपाई भएकोले उत्पादनमा वृद्धि हुने भएको हो ।

गत आर्थिक वर्षमा २ हजार १ सय ५० हेक्टर जग्गामा लगाइएको चैते धानबालीको उत्पादकत्व प्रति हेक्टर ४ दश्मलव ७७ का दरले १० हजार २ सय ५५ मेट्रिकटन धान उत्पादन भएको थियो ।

यस आर्थिक वर्षमा २ हजार ५ सय हेक्टर जग्गामा चैते धानबाली लगाइएकोले उत्पादकत्व प्रति हेक्टर ४ दश्मलव ७७ का दरले ११ हजार ९ सय २५ मेट्रिकटन धान उत्पादन हुने अनुमान गरिएको कृषि ज्ञान केन्द्र सप्तरीका प्रमुख किशुनदेव राउतले जानकारी दिनुभयो ।

सप्तरी जिल्ला चेतै धान उत्पादनका लागि उपयुक्त हावापानी भएकाले गत वर्षभन्दा बढी धान उत्पादन हुने उहाँले विश्वास व्यक्त गर्नुभयो । “अहिले पालिकाहरुले किसानका लागि खेतमै विजुली पुर्‍याएकाे कारण वोर्डिङ्ग, स्यालो टुवेलबाट सिँचाइ सहज बन्दै गरेकोले पनि चैते धान खेती प्रति विगतको भन्दा यस बर्ष किसानको आकर्षण बढेको छ” राउतले भन्नुभयो ।

विगतमा नदी तथा पोखरीबाट मात्र सिचाई हुने गरेको तथा नहरबाट सिंचित हुने क्षेत्रमा समयमै नहरमा पानि नआउँदा चैतै धान रोपाई कम हुने गरेको थियो । बाली उब्जाउने बेलामा नहरमा पानि नदिंदा अहिले पनि चैते धानबाली रोपाईमा बाधा परेको कृषि ज्ञान केन्द्र सप्तरीका प्रमुख राउतको भनाइ छ ।

उपयुक्त पानीको व्यवस्था, समयमा विउ विजन र मलखाघ कृषकलाई सहज रुपमा उपलब्ध भए चैतै धान उत्पादनमा दोब्बरले वृद्धि हुने उहाँको विश्वास छ । सप्तरीको १८ वटा पालिका मध्ये सबैभन्दा बढी चैतै धान उत्पादन छिन्नमस्ता गाउँपालिका, राजगढ गाउँपालिका, विष्णुपुर गाउँपालिका, तिलाठी कोईलाडी गाउँपालिका, महदेवा गाउँपालिका, रुपनी गाउँपालिका, हनुमाननगर कंकालिनी नगरपालिका, वोदे बरसाईन नगरपालिका, खडक नगरपालिका र शम्भुनाथ नगरपालिकामा हुने गरेको कृषि ज्ञान केन्द्र सप्तरीले जनाएको छ ।