.jpg)
टोपलाल अर्याल
रेसुंगा, चैत २२ गते । गुल्मी उद्योग वाणिज्य संघमा अध्यक्ष बाहेकका सबै पद सर्वसम्मत चयन भएका छन् । वाणिज्य संघको उपाध्यक्षमा इश्वरीप्रसाद बेलबासे, गोपालप्रसाद भुसाल र तारा भुसाल सर्वसम्मत निर्वाचित हुनुभएको छ ।
त्यस्तै महासचिवमा चेत नारायण पाण्डेय, सचिवमा विष्णु अधिकारी, कोषाध्यक्षमा इश्वरी कंडेल र सहकोषाध्यक्षमा कृष्ण खनाल सर्वसम्मत निर्वाचित हुनुभएको निर्वाचन समितिले जनाएको छ ।
यसैगरी, सदस्यहरुमा महेशकुमार राज भण्डारी, मदन श्रेष्ठ, तोमलाल पन्थी, ज्ञान बहादुर भलामी, किशोरप्रसाद मरासिनी, रामु सुनार, चन्द्रमणी भण्डारी, चन्द्रमणी पाण्डेय, कमला श्रेष्ठ र शशी केसी निर्वाचित हुनुभएको छ । वाणिज्य संघमा एक अध्यक्ष, उपाध्यक्ष तीन, महासचिव एक, सचिव एक, कोषाध्यक्ष एक, सह–कोषाध्यक्ष एक, महिला सदस्य दुई र खुल्ला सदस्य आठ जना रहने व्यावस्था छ ।
वाणिज्य संघको आगामी नेतृत्वका लागि अध्यक्ष पदमा भने दुई जनाबिच कडा प्रतिस्पर्धा हुने भएको छ । लामो समय वाणिज्य संघमा आवद्ध रहनुभएका वरिष्ठ उपाध्यक्ष रामप्रसाद पन्थी र उपाध्यक्ष मृगेन्द्रप्रसाद श्रेष्ठले उम्मेद्वारी दर्ता गर्नुभएको छ । पन्थीले संघको वरिष्ठ उपाध्यक्ष र धेरै पटकको कार्यकालमा अरुलाई अवसर दिएकाले आफु स्वभाविक उम्मेद्वार भएको दाबी गर्नुभयो । अहिले उपाध्यक्ष रहनुभएका श्रेष्ठले २०५४ सालबाट कार्यसमितिमा रहेर काम गरेको र चार जना अध्यक्षलाई विविध बाध्यताले छोडेको स्मरण गर्दै अध्यक्षको उम्मेद्वारको दाबी गर्नुभयो ।
दुवै जना चुनावी प्रचारमा सक्रिय रहनुभएको छ । व्यवसायीहरुको सवैभन्दा ठुलो संस्थाको निर्वाचन निकै महत्त्वका साथ हेरिएको छ । लामो समय वाणिज्य संघमा सङ्ठगित व्यवसायीहरु पछिल्लो समय राजनीतिक रुपमा विभाजित बनेका थिए । कांग्रेस निकट व्यवसायीहरुले वाणिज्यसंघ र एमाले निकट व्यवसायीले चेम्बर अफ कर्मशको नेतृत्व गरिरहेका छन् । उद्योग वाणिज्य संघमा एउटै पार्टीका दुई व्यवसायी अध्यक्षका उम्मेद्वार बनेकाले परिणामका विभिन्न आङ्कलन बाहिर आउने गरेका छन् ।
वाणिज्य संघमा पाँच सय ८१ मतदाता रहेका छन् । ती मध्ये सयभन्दा बढि मतदाता रहेको दाबी गर्ने एमाले निकट व्यवसायीले निर्णायक भूमिका आफुहरुको रहेको बताउछन् । साधारणसभापछि चैत ९ गते वाणिज्य संघको आगामी नेतृत्वको मनोनयन दर्ताको निर्वाचन कार्यतालिका थियो । तर नेतृत्व सर्वसम्मत बनाउने प्रयास असफल भएपछि दश दिनपछि चैत २१ र २२ निर्वाचनको आयोजना गरिएको थियो । अध्यक्ष पदका लागि आजै मतदान हुने निर्वाचन अधिकृत विष्णु बलालले जानकारी दिनुभयो ।
