चन्द्र पन्दाक
ताप्लेजुङ, चैत २२ गते । ताप्लेजुङको मैवाखोला गाउँपालिकाका दुईवटा वडालाई पूर्णखोप सुनिश्चित वडा घोषणा गरिएको छ । गाउँपालिकाका छमध्ये वडा नम्बर १ र २ ढुङ्गेसाँघुलाई पूर्णखोप सुनिश्चित वडा घोषणा गरिएको हो ।
मैवाखोला गाउँपालिका स्वास्थ्य शाखाका अनुसार दुई वटालाई एकैदिन पूर्णखोप सुनिश्चित वडा घोषणा गरिएको छ । वडा १ का वडाध्यक्ष चन्द्रकुमार तामाङसहितका जनप्रतिनिधि, स्वास्थ्य क्षेत्रमा कार्यरत स्वाथ्यकर्मी लगायतका जनशक्तिको उपस्थितिमा पूर्ण खोप सुनिश्चित वडा घोषणा गरिएको हो ।
यस्तै, वडा २ लाई पनि वडाध्यक्ष नरेन्द्र लिम्बूसहित अन्य जनप्रतिनिधि र स्वास्थ्य क्षेत्रका जनशक्ति लगायतको उपस्थितिमा खोप सुनिश्चित वडा घोषणा गरिएको हो । वडा १ मा रहेका १५ महिनाभित्रका शिशु र १६ देखि ५९ महिनाका समेत ७९ जना बालबालिकालाई आवश्यक सबै खोप लगाएपछि पूर्ण खोप सुनिश्चित वडा घोषणा गरिएको वडाध्यक्ष तामाङले बताउनुभयो ।
त्यस्तै, २ का लक्षित ५२ जना बालबच्चालाई खोप लगाइएको वडाध्यक्ष लिम्बूले जानकारी दिनुभयो । यता वडाहरुलाई पूर्णखोप सुनिश्चित घोषणा गर्ने कार्यमा सहयोग पुर्याउने स्वास्थ्य स्वयंसेविका, स्वास्थ्यकर्मी लगायतका कर्मचारीलाई सम्मानसमेत गरिएको वडा कार्यालयले जनाएका छन् ।
यसैगरी बाँकी रहेका वडालाई पनि क्रमशः पूर्णखोप सुनिश्चित घोषणा गर्दै जाने गाउँपालिका स्वास्थ्य शाखाले जनाएको छ । शाखाका अनुसार सबै वडालाई घोषणा गरिसकेपछि गाउँपालिकालाई पूर्णखोप सुनिश्चित पालिका घोषणा गरिने छ ।
