डोजर रोकेर मजदुर बसे जाग्राम

म्याग्दी समाचारदाता

म्याग्दी, चैत २२ गते । काम सकिएको दुई वर्ष बितिसक्दासम्म पनि आफूहरूले पाउनुपर्ने २१ लाख रुपियाँभन्दा बढी रकम नपाएको भन्दै मजदुरहरूले ठेकेदारको गाडी रोकेर रातभर जाग्राम बसेका छन् । 

सडकखण्डमा काम गर्ने मजदुरको ज्याला नदिई निर्माण कम्पनीले निर्माण क्षेत्रबाट लैजाँदै गरेको उपकरणसहितको डोजरलाई बेनी बजारमा नियन्त्रणमा लिई रातभर जागा बसेरै उक्त गाडी प्रशासनको जिम्मा लगाइएको छ । 

नेपाल बिजुली, पेन्टर, प्लम्बर तथा निर्माण मजदुर युनियन (क्युपेक नेपाल) को अगुवाइमा प्रदेश २–०३ को ००१ क ०१३४ नम्बरको गाडीमा लोड गरेको एक्साभेटरलाई मजदुरहरूले नियन्त्रणमा लिएर जिल्ला प्रशासनमार्फत प्रहरीलाई बुझाइएको क्युपेक केन्द्रीय सचिव एवं महिला विभाग प्रमुख बलादेवी राईले बताउनुभयो ।

चौरजहारी नगरपालिका–८, रुकुम स्थायी वासथान भएका ३५ वर्षीय तुलाराम सार्कीको नेतृत्वमा काम गरेका ३२ भन्दा धेरै मजदुरले ठेकेदारसँगको सम्झौताबमोजिमको विभिन्न बिलबाट २१ लाख ६४ हजार २६५ रुपियाँ पाउन बाँकी रहेको उनीहरूको भनाइ छ  । २०७९ मङ्सिर १५ गते क्याराभान कन्स्ट्रक्सनसँग सम्झौता गरी २०७९ चैत मसान्तसम्म मजदुर कन्ट्र्याक्टमा ल्याएर काम गरेको रकम पूरा प्राप्त नभएको र बाँकी रहेको रकम माग्दा क्याराभान कन्स्ट्रक्सनका प्रबन्ध निर्देशक चन्द्रप्रकाश थकाली पटक पटक धम्की दिने गरेको मजदुरहरूको आरोप छ । 

२०७९ मङ्सिर १५ गते सम्झौता गरेर चैत मसान्तसम्म काम गरेको १५ लाख चार हजार पाँच सय रुपियाँ, २०७८ वैशाख २३ गतेको सम्झौता अनुसार काम गरेको पाँच लाख १७ हजार ९३१ रुपियाँ र अर्को एउटा सम्झौताबमोजिमको एक लाख ४१ हजार  ८३४ रुपियाँ गरी कुल २१ लाख ६४ हजार २६५ रुपियाँ पाउन बाँकी रहेको तुलाराम सार्कीको भनाइ छ ।

क्युपेक नेपालकी केन्द्रीय सचिव राईले भन्नुभयो, “१२ जना मजदुरले रातभरि नै गाडी कुरेर जागा नै बसेका थिए । गाडीका चालकले साँचो लिएर भागेपछि हामीले गाडीअगाडि धर्ना दिएरै बसेका हौँ ।” त्यहीँ बस्दाबस्दै पनि चालक राति १० बजे आएर गाडी स्टार्ट गरेर भगाउन खोजेको र मजदुरहरूले प्रतिकार गरेपछि गाडी छाडेर हिँडेको उहाँको भनाइ छ ।

पश्चिम म्याग्दी हुँदै बागलुङ तथा रुकुम जोड्ने बेनी–दरबाङ सडकखण्ड अन्तर्गत तेस्रो खण्ड रणबाङ–दरबाङमा काम गरेको रकम मजदुरले नपाएका हुन् । जिल्ला प्रशासन कार्यालयमा भएको छलफलमा प्रमुख जिल्ला अधिकारी गुरुदत्त ढकालले मजदुरको ज्याला भुक्तानी गरेपछि मात्रै सबै उपकरण सम्बन्धित निर्माण व्यवसायीलाई फिर्ता दिनुपर्ने मजदुरको अडान रहेको बताउनुभयो ।  जिल्ला प्रशासन कार्यालयमा सर्वपक्षीय छलफलमा जिल्लाका सबै राजनीतिक दलका प्रमुख तथा प्रतिनिधिसहितको उपस्थितिमा छलफल हुँदा ठेकेदार कम्पनीले तत्काल मजदुरको ज्याला भुक्तानी गर्ने विषयमा साझा सहमति भएको छलफलमा सहभागी नेकपा (माओवादी केन्द्र) म्याग्दीका अध्यक्ष शेरबहादुर केसीले बताउनुभयो ।

जिल्ला प्रशासन कार्यालय म्याग्दीमा यसअघि पटक पटक छलफल भए पनि ठेकेदारले रकम भुक्तानी गर्न अटेर गरेपछि सबै ज्यालाबापतको रकम पाउनुपर्ने मजदुरको माग छ । मङ्गला गाउँपालिका–२, रणबाङदेखि मालिका गाउँपालिका–६, दरबाङसम्म आठ किलोमिटर सडक कालोपत्रे गर्न ठेकेदार कम्पनी र पूर्वाधार विकास कार्यालय म्याग्दीबिच २२ करोड ५७ लाख ९३२ रुपियाँमा ठेक्का सम्झौता भएको थियो ।