दोदा नदीमा तटबन्ध निर्माण सुरु

बेलौरी समाचारदाता

बेलौरी (कञ्चनपुर), चैत २२ गते । कञ्चनपुरको दोदा नदीमा पर्ने तटीय क्षेत्रमा तटबन्ध निर्माणको कार्य सुरु भएको छ । जनताको तटबन्ध फिल्ड नम्बर ७ कार्यालय महेन्द्रनगरले ८५० मिटर लम्बाइमा तटबन्ध निर्माणको कार्य अगाडि बढाएको हो । कार्यालयले नदी किनारका विभिन्न खण्डमा तटबन्ध निर्माण कार्य भइरहेको जनाएको छ । जनताको तटबन्ध कार्यालय कञ्चनपुरका प्रमुख इन्जिनियर प्रसाद साहले पुनर्वास नगरपालिका दुई सिमरीगाउँ बाढी प्रभावित क्षेत्रमा बुधबारदेखि तटबन्ध निर्माणको कार्य सुरु भएको जानकारी दिनुभयो ।

उहाँका अनुसार एक वर्षभित्र निर्माण कार्य पूरा गरिसक्ने लक्ष्यसहित अमृत कन्स्ट्रक्सनसँग पाँच करोड २४ लाख ९० हजार रुपियाँमा ठेक्का सम्झौता भएको छ । यस्तै लालझाँडी गाउँपालिका तीन बल्मीमा पनि तटबन्ध निर्माण कार्य अगाडि बढाइएको सो कार्यालयका प्रमुख साहले जानकारी दिनुभयो । बल्मीमा २०० मिटर तटबन्ध निर्माण कार्य भइरहेको उहाँले बताउनुभयो । चुरे भएर बग्ने दोदा नदीले लालझाँडी, बेलौरी र पुनर्वास नगरपालिकाका केही बस्तीमा बर्सेनि डुबान हुँदै आएको छ । बर्सायाममा दोदा नदीले बर्सेनि कटान गर्दै आएपछि लालझाँडी गाउँपालिका–१, २ तथा बेलौरी, पुनर्वास सिमारीका स्थानीयले ठुलो क्षति बेहोर्दै आएका छन् । 

तटबन्ध निर्माण कार्यले नदी आसपासका क्षेत्र सुरक्षित रहने अपेक्षा स्थानीयको छ । निरन्तर कटानी रोक्नका लागि आगामी दिनमा महाकाली नदीको बाढी प्रभावित क्षेत्र र भुजेलामा पनि तटबन्ध निर्माणको कार्य अगाडि बढाइने इन्जिनियर साहले बताउनुभयो ।