स्मिता अर्जेल
मकवानपुरगढी, चैत २१ गते । बागमती प्रदेशका महिला सांसदहरुले सञ्चारकर्मीसँग गुनासो गर्दै संसद बैठकमा बोलिएका कुराहरु सञ्चार माध्यममा नआएको टिप्पणी गर्नुभएको छ ।
बागमती प्रदेशका उपसभामुख अप्सरा चापागाईंसहित प्रदेशसभाका विभिन्न दलका महिला सांसदहरु सञ्चार माध्यम पुरुषमैत्री देखिएको बताउनुहुन्छ ।
विहीबार बागमती प्रदेशको राजधानी हेटौंडामा सम्पन्न भएको महिला अधिकारका क्षेत्रमा वकालत गर्दैआएको महिला कानुन र विकास मञ्चको आयोजनामा ‘महिला प्रदेशसभा सदस्यहरुसँगको अन्तरक्रियात्मक’ कार्यक्रममा सञ्चारमाध्यमले महिलाले संसदमा उठाएका मुद्दालाई गौण बनाउनेगरेको सांसदहरुको भनाइ छ ।
कार्यक्रममा बागमती प्रदेश सभाका उपसभामुख अप्सरा चापागाईंले सञ्चार माध्यमहरुले महिलाको संसद यात्रालाई अझ सशक्त र प्रभावकारी ढंगले अघि बढाउन सञ्चारमाध्यम पहरेदार हुनपर्ने बताउनुभयो । संसदीय पत्रकारिता लैङ्गिक विभेदसँग बाझिन नहुने उहाँको भनाइ छ । सञ्चारकर्मीले आफनो दायरा फराकिलो बनाउनुपर्ने उहाँले बताउनुभयो ।
कार्यक्रममा नेकपा (एमाले) का सांसद भारती पाठकले पुरुष सांसदसरह महिला सासंदसँग पनि उत्तिकै विश्वसनियताका साथ सूचना माग्न आग्रह गर्नुभयो । उहाँले पत्रकारनिकट र दलनिकट समाचार बनाउने प्रवृति देखिएको गुनासो राख्नुभयो ।
नेपाली कांग्रेसकी सांसद समिता खड्कीले संसदभित्र मात्र नभएर बाहिरी व्यवहारमा पनि महिला सांसदलाई भेदभाव गर्नेगरेको महशुस हुनेगरेको बताउनुभयो । महिलालाई गरिने भेदभावपूर्ण व्यवहारले नेतृत्व निभाउन समस्या आइपर्ने गरेको उहाँले बताउनुभयो ।
नेपाली काँग्रेसकी सासंद सुना परियारले आफूले सांसदमा उठाएका महत्वपूर्ण विषयहरु सांसदमै सीमित रहि ओझेलमा पर्नेगरेको गुनासो गर्नुभयो । भावी दिनमा मिडिया र महिला सांसदबिचको समन्वय दरिलो हुनुपर्ने कुरामा उहाँले जोड दिनुभयो ।
कार्यक्रममा समानुपातिक सांसद बालकुमारी विश्वकर्माले दलित तथा उत्पीडित महिलाको आवाजलाई सञ्चारमाध्यममा ल्याउन आग्रह गर्नुभयो । आफूले रोष्टममा पटक पटक दलित तथा उत्पीडित समूदायको आवाज उठाउँदा सञ्चारमाध्यममा नआएको गुनासो सुनाउनुभयो ।
कार्यक्रममा अन्य सांसदहरुले महिलाका आवाज, महिला मुद्दा र चुनौतीलाई समाजमा यथाशिघ्र दर्शाउन सञ्चारमाध्यम महत्वपूर्ण आधार रहेकाले यसमा समन्वयनकारी भूमिकामा जोडिन आम सञ्चार माध्यमलाई आग्रह गरेका छन् ।
एकसय १० सदस्यीय प्रदेशसभा बागमतीमा ४० जना महिला सांसदहरुको सहभागिता रहेको छ । दुईजना सभा सचेतक, एकजना विषयगत समिति सभापति, एकजना उपसभामुख र दुईजना मन्त्रीको जिम्मेवारीमा रहनुभएको छ ।
