भरतपुर (चितवन), पुस ७ गते । नेपाल प्रज्ञा–प्रतिष्ठानको आयोजनामा चितवनको भरतपुरमा एकदिवसीय कविता तथा संस्कृति विमर्श गोष्ठी सम्पन्न भएको छ । विद्यालयमा कुलपति कार्यक्रमअन्तर्गत नारायणी नमुना माध्यमिक विद्यालय, भरतपुरमा कार्यक्रम सञ्चालन गरिएको थियो ।
त्यसैगरी, नेपाल प्रज्ञा–प्रतिष्ठानअन्तर्गत मौखिक इतिहास, काव्य एवं दर्शनशास्त्र विभागको आयोजनामा एक दिवसीय कविता तथा संस्कृति विमर्श गोष्ठी आयोजना गरिएको हो ।
गोष्ठीमा नेपाल प्रज्ञा–प्रतिष्ठानका कुलपति भूपाल राई, प्राज्ञ परिषद् सदस्य बाबा बस्नेत र डा. कौशिला रिसालको उपस्थिति थियो । प्राज्ञसभा सदस्य रामहरि श्रेष्ठको सभापतित्वमा सम्पन्न कार्यक्रममा प्राडा लक्ष्मणप्रसाद गौतम, प्राडा अम्मन जोशीसहित पाँच जना विज्ञले कार्यपत्र प्रस्तुत गर्नुभएको थियो । प्रस्तुत कार्यपत्रमाथि टिप्पणी र विमर्शसमेत गरिएको थियो ।
शब्द, कला तथा साहित्य प्रतिष्ठान चितवनको संयोजनमा सम्पन्न गोष्ठीमा चितवन जिल्लामा रहेका स्थानीय तहका प्रज्ञा–प्रतिष्ठानहरू सह–आयोजकका रूपमा थिए ।
कार्यक्रमको उद्घाटन नेपाल प्रज्ञा–प्रतिष्ठानका कुलपति राईले गर्नुभएको थियो । उहाँले कार्यपत्र प्रस्तोता तथा स्थानीय प्रज्ञा–प्रतिष्ठानका पदाधिकारीहरूलाई मायाको चिनो प्रदान गर्नुभएको आयोजकले जनाएको छ ।
