राधा लुइटेल
पाँचथर, चैत २१ गते । पाँचथरको फिदिम नगरपालिका र कुम्मायक गाउ‘पालिकाका दुईवटा जंगलमा जथाभावी लगाइएको डढेलोमा परेर पाँच जना घाइते भएका छन् ।
घाइतेमध्ये एक बृद्वा, एक बालिका र तीन महिला छन् । उहाँहरुमध्ये दुई जनाको अवस्था चिन्ताजनक रहेको जिल्ला प्रहरी कार्यालय पाँचथरका सूचना अधिकारी (प्रहरी निरीक्षक) बिनालाल साह (तेली) ले जानकारी दिनुभयो ।
कुम्मायक गाउ‘पालिका ३ ताम्राखुका अमरसिंह थापा र पदम खड्काको नीजि वनमा लागेको डढेलोमा पर्दा स्थानीय २८ वर्षीया सपना सम्बाहाम्फे, उहॉकी ११ वर्षीया छोरी सिवाना सम्बाहाम्फे, २२ वर्षीया प्रतिमा सम्वाहाम्फे र ६० वर्षीया निरमाया सम्बाहाम्फे घाइते हुनुभएको हो । विहीबार दिउँसो जंगलमा घॉस दाउरा गर्न जंगल गएका चारैजना जंगलको पुछारबाट सल्केको डढेलोमा पर्दा घाइते भएको बताइएको छ ।
घाइतेमध्ये प्रतिमाको अवस्था गम्भीर छ । घाइते चारैजनालाई डढेलो लाग्दै गरेको स्थानबाट उद्वारगरी थप उपचारार्थ सुनसरीको धरानस्थित विपी कोइराला स्वास्थ्य विज्ञान प्रतिष्ठान धरान पठाइएको छ । सो आगलागीमा परी सातवटा घरमा क्षति पुग्नुका साथै ४० लाख हाराहारीको क्षति भएको प्रहरीको भनाइ छ ।
जिल्ला प्रहरी कार्यालय पाँचथर र इलाका प्रहरी चौकी यासोकबाट खटेका प्रहरी स‘गै स्थानीयको सक्रियतामा राति साढे ९ बजे नियन्त्रणमा आएको छ । यस्तै, फिदिम नगरपालिका १३ जौवारीको जंगलमा विहीबार मध्यान्ह लागेको डढेलोमा पर्दा ४७ वर्षकी स्थानीय उषाकला नेम्वाङ राई गम्भीर हुनु भएको छ ।
उहाँ जंगलमा दाउरा खोज्न गएका बखत सल्केको डढेलोमा परेर घाइते हुनुभयो । नेम्वाङलाई पाँचथर अस्पतालमा प्रारम्भिक उपचार पश्चात थप उपचारका लागि धरानस्थित विपी कोइराला स्वास्थ्य विज्ञान प्रतिष्ठान धरान पठाइएको प्रहरीले जनाएको छ ।
